Yaponiyalik milliarder Oyga birgalikda parvoz qilish uchun dijey Aoki va K-pop yulduzini tanlab oldi

Yaponiyalik milliarder Yusaku Maedzava Oyga sayohat qilish uchun to‘plagan jamoaga 11 kishi kirdi. Tadbirkor o‘z samoviy missiyasi uchun alohida sayt yaratdi.

Crew for Moon Trip Selected!!#dearMoonCrew @dearmoonprojecthttps://t.co/P0vEZ6Cibo

— Yusaku Maezawa (MZ) (@yousuckMZ) December 8, 2022

Uning parvoz ekipaji tarkibidagi eng taniqlig shaxslar — kelib chiqishi yaponiyalik bo‘lgan amerikalik dijey — Stiv Aoki va K-pop xonandasi T.O.P. (haqiqiy simi — Choy Sun Xun).

11 nafar ekipaj a’zosidan uch nafari — ayollar. To‘rt kishi, shu jumladan, Aoki AQSH fuqarolaridir.

Aoki e’tirof etishicha, Rossiyaga gastrol safari chog‘ida ushbu ekipaj a’zosiga aylanganidan xabar topgan.

Maedzavaning parvozi 2023-yilga rejalashtirilgan. Parvoz uchun raketani Ilon Maskning SpaceX kompaniyasi taqdim etadi. Maedzava kemadagi sakkizta joyning barchasini sotib oldi, ekipajning yana uch a’zosi zaxira sifatida tanlab olindi. Kema Oygacha uchib, so‘ng qaytib kelishi kutilmoqda, bunga esa bir hafta vaqt ketishi ko‘zda tutilgan.

Maedzava — 46 yoshli milliarder. U Yaponiyadagi eng yirik Zozotown kiyim-kechak do‘koniga asos solgan. 2019-yil sentabr oyida tadbirkor o‘z aksiyalarining katta qismini Yahoo Japan kompaniyasiga sotishga qaror qilgan, o‘shanda bitim qiymati 3,7 milliard dollarni tashkil etgan edi. Maedzava Forbes’ning 2020-yildagi eng boy yaponiyaliklar ro‘yxatida 23-o‘rinni egallagan. Nashr ma’lumotlariga ko‘ra, uning boyligi 2 milliard dollarga baholanadi. Forbes global reytingida u 2020-yildan beri 412 ta pog‘onani yo‘qotib, ayni paytda 1547-o‘rinni egallab turibdi.

SpaceX 2017-yilning boshida Oy bo‘ylab tijoriy parvoz amalga oshirish rejasini ma’lum qilgan edi. 2018-yilda kompaniya rahbari Ilon Mask Maedzavaning Oyga borishi kutilayotgan birinchi sayyoh bo‘lishini e’lon qildi. O‘shanda SpaceX butun tarix davomida Oyga atigi 24 kishi tashrif buyurganini va Amerikaning 1972-yilgi Apollon missiyasidan keyin u yerga boshqa biror kim bormaganini ta’kidlagan.

2020-yilda yaponyalik milliarder koinotga birgalikda sayohat qilish uchun o‘ziga qiz hamroh qidirayotganini aytib, tanlov e’lon qilgan. Milliarder o‘z Twitter’da qidiruv jarayoni haqida hujjatli ko‘rsatuv namoyish qilishi kerak bo‘lgan Yaponiyaning Abema TV striming xizmatiga havola joylashtirgan. Unda tanlovda ishtirok etish uchun ariza berish ham mumkin edi. Maedzavaning ta’kidlashicha, ariza beruvchi kosmik parvozlarga qiziqadigan va ularga tayyorgarlik ko‘rishda ishtirok eta oladigan 20 yosh va undan katta bo‘lgan yolg‘iz ayol bo‘lishi kerak edi. Talabga ko‘ra, shuningdek, nomzodlar “har doim nekbin” bo‘lishi va dunyo tinchligini xohlashi kerak. Ikki hafta davomida tanlovda ishtirok etish uchun 28 mingga yaqin ayol ariza yuborgan, ammo keyinchalik Maedzava taklifni bekor qildi va “xudbinlarcha qilingan qarori” uchun uzr so‘radi.