Serbiya Kosovoga ming nafar xavfsizlik kuchlarini yuborish bilan tahdid qildi

Kosovoning 350 ga yaqin politsiya xodimi Kosovo shimoli va Metoxiya (Serbiyadagi avtonom o‘lka)ga bostirib kirdi hamda Kosovska-Mitrovitsa shahrini “egalladi”. Bu haqda Serbiya hukumati huzuridagi Kosovo va Metoxiya bo‘yicha kansleryariya rahbari Petar Petkovich ma’lum qildi. Uning so‘zlariga ko‘ra, Serbiya hukumati xavfsizlik kuchlarining 1000 nafar a’zosini Kosovo hududiga qaytarish masalasini ko‘rib chiqmoqda.

Petkovichning aytishicha, qisman tan olingan respublika shimoliga 300—350 ga yaqin bronejiletli politsiyachi va maxsus kuchlar vakillari yetib kelgan. Ularning barchasi “uzun stvolli qurollar ko‘targan, to‘liq jangovar jihozlar va zirhli mashinalarda”. Petkovichning so‘zlariga ko‘ra, xavfsizlik kuchlari “butun shaharni tom ma’noda egallab, to‘sib qo‘ygan”.

“Belgrad BMT Xavfsizlik kengashining 1244-rezolyutsiyasi 4-bandida nazarda tutilganidek, Kosovo va Metoxiya hududiga ming nafargacha xavfsizlik kuchlarimizni qaytarish masalasini ko‘rib chiqmoqda”, — dedi Petkovich shoshilinch ravishda o‘tkazilgan matbuot anjumanida.

Kosovska-Mitrovitsada serblar yashaydi. Kecha, 8-dekabr kuni OAV shaharga 200 dan 300 gacha Kosovo maxsus kuchlari yetib kelgani va shimolga, Boshnyachka Mahala hududiga yo‘l olgani haqida xabar bergandi. Kosovo politsiyasi “barcha fuqarolar xavfsizligini ta’minlash” maqsadida respublikaning shimoliy qismida zobitlar sonini oshirishga qaror qilganini tasdiqladi. Bryusselda Serbiya va Kosovo hukumatlari o‘rtasida tuzilgan kelishuvlarga ko‘ra, Kosovo politsiyasi Serbiyaning to‘rtta munitsipaliteti boshliqlarining ruxsatisiz serblar yashaydigan hududlarga kirish huquqiga ega emas.