SpaceX kompaniyasining ilk kosmik sayyohiga aylanishi kutilayotgan yaponiyalik milliarder Yusaku Maedzava Oyga birgalikda parvoz qilish uchun sakkiz kishilik jamoaga nomzodlarni qabul qilishi to‘g‘risida e’lon qildi. Bu haqda u o‘zining Twitter’dagi videomurojaatida aytib o‘tdi, deb yozadi “RBK”.

Yusaku Maedzava.

Foto: Reuters

“Men ushbu missiyada ishtirok etish uchun jamoa yig‘moqchiman. Sayohatga 10—12 kishi yo‘l oladi, shundan sakkiz nafarini shaxsan o‘zim taklif qilaman”, — dedi Maedzava.

Maedzavaning so‘zlariga ko‘ra, parvoz 2023-yilda amalga oshiriladi. Tanlovda ishtirok etish istagida bo‘lgan nomzod ikkita shartga javob berishi kerak: birinchisi, u o‘z faoliyati to‘g‘risida gapirib berishi va Oyga parvoz unga jamiyat uchun yanada ko‘proq yordam berishida qanday ahamiyat kasb etishini tushuntirishi kerak. Ikkinchi shartga ko‘ra, nomzod jamoada ishlash va uning a’zolarini qo‘llab-quvvatlashga tayyor bo‘lishi kerak.

Maedzava — 45 yoshli milliarder. U Yaponiyadagi eng yirik Zozotown kiyim-kechak do‘koniga asos solgan. 2019-yil sentabr oyida tadbirkor o‘z aksiyalarining katta qismini Yahoo Japan kompaniyasiga sotishga qaror qilgan, o‘shanda bitim qiymati 3,7 milliard dollarni tashkil etgan edi. Maedzava Forbes’ning 2020-yildagi eng boy yaponiyaliklar ro‘yxatida 23-o‘rinni egallagan. Nashr ma’lumotlariga ko‘ra, uning boyligi 2 milliard dollarga baholanadi. Forbes global reytingida u 2020-yildan beri 412 ta pog‘onani yo‘qotib, ayni paytda 1547-o‘rinni egallab turibdi.

SpaceX 2017-yilning boshida Oy bo‘ylab tijoriy parvoz amalga oshirish rejasini ma’lum qilgan edi. 2018-yilda kompaniya rahbari Ilon Mask Maedzavaning Oyga borishi kutilayotgan birinchi sayyoh bo‘lishini e’lon qildi. O‘shanda SpaceX butun tarix davomida Oyga atigi 24 kishi tashrif buyurganini va Amerikaning 1972-yilgi Apollon missiyasidan keyin u yerga boshqa biror kim bormaganini ta’kidlagan.

2020-yilda yaponyalik milliarder koinotga birgalikda sayohat qilish uchun o‘ziga qiz hamroh qidirayotganini aytib, tanlov e’lon qilgan. Milliarder o‘z Twitter’da qidiruv jarayoni haqida hujjatli ko‘rsatuv namoyish qilishi kerak bo‘lgan Yaponiyaning Abema TV striming xizmatiga havola joylashtirgan. Unda tanlovda ishtirok etish uchun ariza berish ham mumkin edi. Maedzavaning ta’kidlashicha, ariza beruvchi kosmik parvozlarga qiziqadigan va ularga tayyorgarlik ko‘rishda ishtirok eta oladigan 20 yosh va undan katta bo‘lgan yolg‘iz ayol bo‘lishi kerak edi. Talabga ko‘ra, shuningdek, nomzodlar “har doim nekbin” bo‘lishi va dunyo tinchligini xohlashi kerak. Ikki hafta davomida tanlovda ishtirok etish uchun 28 mingga yaqin ayol ariza yuborgan, ammo keyinchalik Maedzava taklifni bekor qildi va “xudbinlarcha qilingan qarori” uchun uzr so‘radi.

Avvalroq SpaceX kompaniyasi 2021-yilning oxiriga qadar to‘rtta sayyohni orbitaga yubormoqchiligi xabar qilingandi. Amerikalik milliarder Jared Ayzekman SpaceX’ning orbitaga xususiy parvozi pulini to‘lagan. Ekipajning bir a’zosi lotereya orqali aniqlanadi.