Япониялик миллиардер Ойга биргаликда парвоз қилиш учун дижей Аоки ва K-pop юлдузини танлаб олди

Япониялик миллиардер Юсаку Маэдзава Ойга саёҳат қилиш учун тўплаган жамоага 11 киши кирди. Тадбиркор ўз самовий миссияси учун алоҳида сайт яратди.

Crew for Moon Trip Selected!!#dearMoonCrew @dearmoonprojecthttps://t.co/P0vEZ6Cibo

— Yusaku Maezawa (MZ) (@yousuckMZ) December 8, 2022

Унинг парвоз экипажи таркибидаги энг таниқлиг шахслар — келиб чиқиши япониялик бўлган америкалик дижей — Стив Аоки ва K-pop хонандаси Т.О.П. (ҳақиқий сими — Чой Сун Хун).

11 нафар экипаж аъзосидан уч нафари — аёллар. Тўрт киши, шу жумладан, Аоки АҚШ фуқароларидир.

Аоки эътироф этишича, Россияга гастрол сафари чоғида ушбу экипаж аъзосига айланганидан хабар топган.

Маэдзаванинг парвози 2023 йилга режалаштирилган. Парвоз учун ракетани Илон Маскнинг SpaceX компанияси тақдим этади. Маэдзава кемадаги саккизта жойнинг барчасини сотиб олди, экипажнинг яна уч аъзоси захира сифатида танлаб олинди. Кема Ойгача учиб, сўнг қайтиб келиши кутилмоқда, бунга эса бир ҳафта вақт кетиши кўзда тутилган.

Маэдзава — 46 ёшли миллиардер. У Япониядаги энг йирик Zozotown кийим-кечак дўконига асос солган. 2019 йил сентябрь ойида тадбиркор ўз акцияларининг катта қисмини Yahoo Japan компаниясига сотишга қарор қилган, ўшанда битим қиймати 3,7 миллиард долларни ташкил этган эди. Маэдзава Forbes’нинг 2020 йилдаги энг бой японияликлар рўйхатида 23-ўринни эгаллаган. Нашр маълумотларига кўра, унинг бойлиги 2 миллиард долларга баҳоланади. Forbes глобал рейтингида у 2020 йилдан бери 412 та поғонани йўқотиб, айни пайтда 1547-ўринни эгаллаб турибди.

SpaceX 2017 йилнинг бошида Ой бўйлаб тижорий парвоз амалга ошириш режасини маълум қилган эди. 2018 йилда компания раҳбари Илон Маск Маэдзаванинг Ойга бориши кутилаётган биринчи сайёҳ бўлишини эълон қилди. Ўшанда SpaceX бутун тарих давомида Ойга атиги 24 киши ташриф буюрганини ва Американинг 1972 йилги Аполлон миссиясидан кейин у ерга бошқа бирор ким бормаганини таъкидлаган.

2020 йилда японялик миллиардер коинотга биргаликда саёҳат қилиш учун ўзига қиз ҳамроҳ қидираётганини айтиб, танлов эълон қилган. Миллиардер ўз Twitter’да қидирув жараёни ҳақида ҳужжатли кўрсатув намойиш қилиши керак бўлган Япониянинг Абема ТВ стриминг хизматига ҳавола жойлаштирган. Унда танловда иштирок этиш учун ариза бериш ҳам мумкин эди. Маэдзаванинг таъкидлашича, ариза берувчи космик парвозларга қизиқадиган ва уларга тайёргарлик кўришда иштирок эта оладиган 20 ёш ва ундан катта бўлган ёлғиз аёл бўлиши керак эди. Талабга кўра, шунингдек, номзодлар «ҳар доим некбин» бўлиши ва дунё тинчлигини хоҳлаши керак. Икки ҳафта давомида танловда иштирок этиш учун 28 мингга яқин аёл ариза юборган, аммо кейинчалик Маэдзава таклифни бекор қилди ва «худбинларча қилинган қарори» учун узр сўради.