Shengen bitimi mamlakatlari ularga Xorvatiyaning qo‘shilishini qo‘llab-quvvatladi. Shengen hududiga kiruvchi 26 ta davlatning barchasi buni yoqlab ovoz berdi.
Xorvatiya 2023-yil 1-yanvardan Shengen bitimi a’zosiga aylanadi.
Yevrokomissiya Bolgariya va Ruminiyani ham Shengen hududiga qabul qilishni taklif etdi, biroq ularning bitimga qo‘shilishini barcha mamlakatlar ham qo‘llab-quvvatlamadi.
Xususan, Avstriya Shengenga Bolgariya va Ruminiyaning ham qo‘shilishiga qarshi chiqqan bo‘lsa, Niderlandiya Ruminiyani qo‘llab-quvvatlagan, ammo Bolgariyani rad etgan. Shu bilan birga ta’kidlanishicha, Bolgariya va Ruminiya Yevroittifoqqa Xorvatiyadan avvalroq a’zo bo‘lgan.
Avstriya Bolgariya va Ruminiyani Shengen hududida ko‘rishni istamasligini ushbu mamlakatlar orqali noqonuniy migratsiyadan xavfsirayotgani bilan izohladi. O‘z navbatida Niderlandiya “qonun ustuvorligi bilan bog‘liq hal qilinmagan muammolar” va korrupsiya va uyushgan jinoyatchilikka qarshi kurash sohasidagi qonunchilik kamchiliklari tufayli Bolgariyaning qo‘shilishiga qarshi ovoz berdi.
Shengen zonasi ichkarisida bitimni imzolagan mamlakatlar fuqarolari pasport va immigratsiya nazoratisiz ko‘chib yura oladi. Shuningdek, bitim mamlakatlaridan birining Shengen vizasini olgan sayyohlar uni imzolagan boshqa mamlakatlarga ham tashrif buyurishi mumkin.
Shengen bitimi amal qiladigan Shengen zonasi 1995-yildan buyon mavjud. Koronavirus pandemiyasi chog‘ida Shengen bitimi mamlakatlarida chegaralardagi tekshiruvlar qisman qayta tiklandi. 2022-yilda Shengen zonasiga kiradigan qator mamlakatlar Shengen sayyohlik vizalariga ega Rossiya va Belarus fuqarolariga o‘z hududiga kirishni taqiqladi.
Izoh (0)