Mo‘g‘uliston poytaxti Ulan-Batorda ommaviy norozilik aksiyalari uchinchi kun ham davom etmoqda, namoyishchilar mansabdorlarni ko‘mir yetkazib berish sohasidagi korrupsiyalarda ayblamoqda. Bu haqda Mo‘g‘ulistonning Sonin nashri xabar bermoqda.
Mo‘g‘uliston poytaxti rahbari Dolgorsurengiyn Sumyaabazar poytaxtdagi markaziy maydonda va hukumat qarorgohi yaqinida namoyishga chiqqanlarni kuch bilan tarqatish haqida buyruq berdi. Shu bilan birga, tegishli organlarga ishtirokchilarni zarurat yuzaga kelgan taqdirda fuqarolarning majburan tarqatilishi haqida oldindan ogohlantirish yuklatildi.
“Bugungi namoyishlar ro‘yxatga olinmagan va ularda qatnashayotgan fuqarolar xavfsizligi to‘liq ta’minlanmagan. Shu tariqa, milliy xavfsizlikka, inson huquq va erkinliklariga zarar yetkazib, jamoat tartibini buzishi mumkin bo‘lgan tartibsizliklar munosabati bilan, tegishli moddalar asosida Ulan-Bator gubernatori aksiyalarni tarqatib yuborish haqida farmon chiqardi”, — deyiladi xabarda.
Ta’kidlanishicha, politsiyachilar olomonni tarqatish uchun kuch qo‘llashiga hojat bo‘lmagan, chunki Ulan-Batordagi namoyishlar tinch yo‘l bilan yakunlangan. Shu munosabat bilan, poytaxt gubernatori o‘z buyrug‘ini bekor qilgan, militsiya xodimlari esa ogohlik darajasini pasaytirgan.
Bundan tashqari, Mo‘g‘uliston prezidenti Uxnaagiyn Xurelsux mamlakatda favqulodda holat rejimini kiritish uchun zarurat yo‘qligini aytdi. Uni mamlakat bosh vaziri Luvsannamsrayn Oyuun Erdene qo‘llab-quvvatladi.
Bu orada Xitoy Tashqi ishlar vazirligi rasmiy vakili Mao Nin Xitoy tegishli so‘rov kelib tushgan taqdirda, Mo‘g‘ulistonga ehtimoliy o‘g‘riliklarni tekshirishda yordam berishga tayyorligini bildirdi.
Eslatib o‘tamiz, Mo‘g‘ulistonda 3-dekabr kuni Xitoyga eksport qilinadigan ko‘mir atrofida korrupsiya mojarosi yuz berdi.
Avvalroq Xitoy OAVlari mamlakat Mo‘g‘uliston hukumatiga poraxo‘r davlat xizmatchilari ro‘yxatini bergani haqida ma’lum qilgandi. Ular jinoiy sxema yordamida ko‘mir savdosidan 12,9 milliarddan 17,6 milliard dollargacha o‘g‘irlagan. Mo‘g‘uliston mansabdorlar ismlarini oshkor qilishdan bosh tortdi, shundan keyin Ulan-Batorda bu ma’lumotlarni oshkor etishni talab qilib namoyishlar boshlandi. 5-dekabr kuni aksiya ishtirokchilari Hukumat saroyini egallab olishga urindi, oqibatda olti kishi jabrlandi.
Izoh (0)