Turkmanistonda vatanparvarlik qo‘shiqlari sadosi ostida narkotiklar va kontrabanda tamaki mahsulotlari yoqib yuborildi, deb xabar beradi “Xronika Turkmenistana”.
Narkotik vositalar va kontrabanda tamaki mahsulotlarini yo‘q qilish bo‘yicha aksiya Axal viloyati Gokdepa tumanida joylashgan maxsus majmuada bo‘lib o‘tdi. Tadbirda parlamentning ikkala palatasi rahbarlari, hukumat, davlat xavfsizlik kengashi a’zolari, jamoatchilik tashkilotlari, sog‘liqni saqlash sohasi, ommaviy axborot vositalari vakillari, oqsoqollar ishtirok etdi.
Yig‘ilganlarga musodara etilgan narkotik moddalar, kontrabanda tamaki va farmatsevtika buyumlarini yo‘q qilish jarayoni namoyish etildi, shundan keyin qadoqlangan qoplar birma-bir maxsus pechlar o‘txonasiga yuborildi.
Huquq-tartibot organlari nazorati ostida qoplarni yo‘q qilishda istalgan kishi qatnashishi mumkin bo‘ldi.
Butun jarayon Turkmaniston Ichki ishlar vazirligi musiqiy kollektivi ijrosidagi vatanparvarlik qo‘shiqlari sadosi ostida bo‘lib o‘tdi.
Aynan qanaqa narkotiklar va qancha miqdorda yo‘q qilinganiga aniqlik kiritilmadi.
Tadbirdan keyin ishtirokchilarga IIV Iskovuch itlar markazining narkotiklarni qidiruvchi alabay itlari namoyish qilindi.
Ta’kidlanishicha, bunday aksiyalar hukumat tomonidan har yili bir marta o‘tkaziladi. O‘tgan yili narkotiklar 25-dekabrda yondirilgan.
2020-yil dekabrida Turkmaniston prezidenti Gurbanguli Berdimuhamedov Ashxoboddan 100 kilometr shimolda joylashgan narkotiklarni yoqish uchun yangi majmuani ochib bergandi. O‘shanda u kontrabanda yo‘li bilan olib kelingan giyohvand moddalarni maxsus pechda yo‘q qilish tadbirida qatnashgan, tadbir chog‘ida jami 122,5 kg narkotik moddalar yo‘q qilingan edi.
Izoh (0)