Ukraina 24-fevraldan keyin Rossiya tomonidan egallab olingan hududlarini qaytarib olishi uchun AQSH unga yordam berishda davom etmoqda, dedi AQSH davlat kotibi Entoni Blinken The Wall Street Journal konferensiyasida.
“Bizning e’tiborimiz o‘zimiz qilayotgan narsani davom ettirishga qaratilgan, ya’ni Ukraina 24-fevraldan buyon bosib olingan hududlarini qaytarib olishi, Rossiyaga qarshilik ko‘rsatishi, o‘z-o‘zini himoya qilishi uchun kerak bo‘lgan hamma narsaga ega ekaniga ishonch hosil qilishga yo‘naltirilgan”, — dedi Blinken va Kiyevga harbiy yordamdan tashqari, iqtisodiy va gumanitar ko‘mak ham zarurligini qo‘shib qo‘ydi.
Jurnalistning Ukraina Qrimni qaytarib olmoqchiligi haqidagi savoliga javob berar ekan, AQSH davlat kotibi ukrainaliklar “qayerga borishni xohlashi, buni qachon va qanday qilishi haqida o‘zlari qaror qabul qilishi”ni ta’kidladi.
Sentabr oxirida DXR, LXR, Zaporojye va Xerson viloyatlari referendumlar natijalariga ko‘ra Rossiya tarkibiga kirgandi. Shundan keyin Ukraina prezidenti Vladimir Zelenskiy Qrim, Donbass, Xerson va Zaporojye viloyatlari mustaqilligini tan olmaslik haqida farmon imzoladi. U, shuningdek, Qrimni qaytarib olish rejalari haqida ham gapirgandi.
AQSH Rossiya harbiy operatsiyasi boshlanganidan buyon Kiyevga harbiy yordam ko‘rsatib, qurol-yarog‘, harbiy texnika yetkazib bermoqda va ukrainalik harbiylarni o‘qitmoqda. Shu bilan birga, AQSH prezidenti Jo Bayden AQSH Ukraina va Rossiya nizosiga bevosita aralashish va o‘z qo‘shinlarini kiritish niyati yo‘qligini ko‘p bora takrorlagan.
Rossiya prezidenti matbuot kotibi Dmitriy Peskov Vashington tomonidan Kiyevga qurol yetkazilishi nizoni cho‘zib yuborishi va uni yanada “og‘riqliroq” qilishini, ammo yakuniy natijaga ta’sir o‘tkazmasligini aytgandi.
Izoh (0)