АҚШ Тайванга ҳарбий ёрдам пакетига 882 миллион долларлик 100 тагача такомиллаштирилган Patriot ҳаво ҳужумига қарши мудофаа ракеталарини қўшишни таклиф қилди. Бу ҳақда Bloomberg Давлат департаменти ҳужжатларига таяниб хабар берди.
Гап Тайванга аввалроқ юборилган Patriot ПАC-3 ракеталарининг такомиллаштирилган версияларидан иборат 100 тагача ракетани етказиб бериш ҳақида бормоқда.
Бу таклиф АҚШ ва Тайван ўртасида 2010 йилда тузилган битимга қўшимча бўлади, унинг потенциал умумий қиймати — 2,81 миллиард долларга тенг. Мақсади эса оролга ҳудудий яхлитлигини ҳимоя қилиш ва минтақавий барқарорликка таҳдидлар олдини олиш имконини бериш учун, унинг ракетага қарши мудофаа қобилиятини яхшилашдан иборат.
Аввалроқ АҚШ ҳукумати ҳарбий ёрдамнинг катта қисми Украинага йўналтирилгани учун, Тайванни барча зарур қурол-яроғ билан таъминлай олмаслигидан хавотирланаётгани маълум бўлган эди. Вашингтон Тайванга қурол-яроғ етказиб бериш бўйича қарийб 19 миллиард долларга орқада қолмоқда.
Орол ҳалигача АҚШдан 208 та Javelin танкка қарши мажмуалари ва 215 та Stinger ҳаво ҳужумига қарши ракета мажмуаларини олгани йўқ, ваҳоланки улар учун 2015 йил декабрида буюртма берилган.
8 ноябрь куни Тайван президенти Сай Инвен тез орада Хитойнинг Тайванга босқини юз бериши мумкинлигини айтди. Унинг сўзларига кўра, Хитой ҳукумати аста-секин Тайван бўғозини назорат остига олмоқда, бу эса келажакда оролни қамалда қолдириши мумкин.
Октябрь ойи ўрталарида Хитой етакчиси Си Цзиньпин Пекин Тайвандаги сепаратизмга ва бошқа мамлакатларнинг орол ички ишларига аралашувига қаршилигини айтганди. Унинг таъкидлашича, Хитой раҳбарияти Тайван билан «тинч йўл орқали бирлашиш» тарафдори, аммо куч ишлатишни ҳам истисно қилмайди.
Изоҳ (0)