Yevropa Ittifoqi Rossiya neft narxiga chegara qo‘yish bo‘yicha kelisha olmadi — Reuters

Bryusseldagi yig‘ilishda Yevropa Ittifoqi davlatlari Rossiya neftiga yuqori narx chegarasi joriy etish bo‘yicha kelisha olmadi. Bu haqda Reuters xabar bermoqda.

Ma’lumotlarga ko‘ra, bir barrel neft uchun maksimal narxni 65-70 dollar oralig‘ida belgilash taklifi muhokama qilingan. Biroq bu ba’zi davlatlar uchun juda past, boshqalari uchun esa yuqori bo‘lib chiqqan.

Polsha, Litva va Estoniya bir barrel uchun 65-70 dollar Rossiyaga juda yuqori foyda keltiradi, deb hisoblaydi, chunki ishlab chiqarish tannarxi bir barrel uchun 20 dollarni tashkil qiladi.

Kipr, Gretsiya va Malta — Rossiya neftini tankerlar orqali tashish orqali kun kechirayotgan davlatlar yuqori chegara juda past ekanligini aytdi. Shuningdek, yo‘qolgan biznes uchun kompensatsiya yoki yangi sharoitlarga moslashish uchun ko‘proq vaqt talab qilmoqda.

Polsha bir barrel uchun 30 dollardan baland narxga rozi emas. Kipr tovon puli talab qilmoqda. Gretsiyaga esa ko‘proq vaqt kerak, — deyiladi materialda.

Yakuniy qaror barcha elchilarning roziligini talab qiladi. Rossiya neftining bozor qiymati hozir 68 dollar atrofida.

Avvalroq Yevropa Ittifoqi Rossiya neftining yuqori narx chegarasini 65-70 dollar qilib belgilashi haqida xabar berilgandi.

Mavzuga doir:

• G7 davlatlari 23-noyabr kuni Rossiya nefti narxining maksimal darajasini e’lon qilmoqchi — Bloomberg;
• Yevropa Ittifoqi Rossiya neftiga yuqori narx chegarasini belgilashga tayyorligi ma’lum qilindi.