Kanada uch yilda 1,5 million muhojirni jalb qilmoqchi

Kanada yaqin uch yil ichida 1,5 million muhojirni jalb qilishni rejalashtirmoqda. Bu haqda BBC News xabar berdi. 

Noyabr oyi boshida Kanada hukumati 2025-yilgacha har yili 500 mingga yaqin muhojirni jalb etish rejalarini e’lon qildi.

Ta’kidlanishicha, tug‘ilishning pastligi va aholining qarishi Kanadani immigratsiyaga murojaat qilishga majbur qilmoqda. 

Hukumat ma’lumotlariga ko‘ra, Kanada ishchi kuchining o‘sishi allaqachon immigratsiya hisobiga deyarli 100 foizni tashkil qilmoqda. 

2032-yilga kelib, asosan, muhojirlar aholi o‘sishini ta’minlaydi, deydi rasmiylar. Kanada immigrantlarga yashash uchun ruxsat beradi, lekin fuqarolikni emas.

Kanadadagi muhojirlar allaqachon aholining deyarli 25 foizini tashkil qiladi. Bu boshqa rivojlangan mamlakatlarga qaraganda ancha ko‘proq. Masalan AQSH va Buyuk Britaniyada mazkur ko‘rsatkich 14 foizni tashkil qiladi. 

Kanadani boshqa G‘arb davlatlaridan ajratib turadigan jihati shundaki, muhojirlarning yarmidan ko‘pi o‘z kasbiy mahorati tufayli ushbu davlatga kelgan.