Европа Иттифоқи Россия нефть нархига чегара қўйиш бўйича келиша олмади — Reuters

Брюсселдаги йиғилишда Европа Иттифоқи давлатлари Россия нефтига юқори нарх чегараси жорий этиш бўйича келиша олмади. Бу ҳақда Reuters хабар бермоқда.

Маълумотларга кўра, бир баррель нефть учун максимал нархни 65-70 доллар оралиғида белгилаш таклифи муҳокама қилинган. Бироқ бу баъзи давлатлар учун жуда паст, бошқалари учун эса юқори бўлиб чиққан.

Польша, Литва ва Эстония бир баррель учун 65-70 доллар Россияга жуда юқори фойда келтиради, деб ҳисоблайди, чунки ишлаб чиқариш таннархи бир баррель учун 20 долларни ташкил қилади.

Кипр, Греция ва Мальта — Россия нефтини танкерлар орқали ташиш орқали кун кечираётган давлатлар юқори чегара жуда паст эканлигини айтди. Шунингдек, йўқолган бизнес учун компенсация ёки янги шароитларга мослашиш учун кўпроқ вақт талаб қилмоқда.

Польша бир баррель учун 30 доллардан баланд нархга рози эмас. Кипр товон пули талаб қилмоқда. Грецияга эса кўпроқ вақт керак, — дейилади материалда.

Якуний қарор барча элчиларнинг розилигини талаб қилади. Россия нефтининг бозор қиймати ҳозир 68 доллар атрофида.

Аввалроқ Европа Иттифоқи Россия нефтининг юқори нарх чегарасини 65-70 доллар қилиб белгилаши ҳақида хабар берилганди.

Мавзуга доир:

• G7 давлатлари 23 ноябрь куни Россия нефти нархининг максимал даражасини эълон қилмоқчи — Bloomberg;
• Европа Иттифоқи Россия нефтига юқори нарх чегарасини белгилашга тайёрлиги маълум қилинди.