Markaziy bank pul-kredit siyosatining 2023-yil va 2024—25-yillar davriga mo‘ljallangan asosiy yo‘nalishlarini taqdim qildi.
Ta’kidlanishicha, pul-kredit siyosatining asosiy yo‘nalishlarida sohada amalga oshiriladigan tadbirlar, tashqi va ichki iqtisodiy sharoitlar o‘zgarishiga Markaziy bankning munosabati va javob choralari, pul-kredit siyosatini yuritishdagi yondashuvlar va takomillashtirish istiqbollari aks ettirilgan.
2022-yilda makroiqtisodiy vaziyatga ta’sir ko‘rsatuvchi omillar va ularning xususiyatlari avvalgi yillardagidan keskin farq qildi, — deydi Markaziy bank.
Markaziy bankning ta’kidlashicha, 2021-yilning oxiri va 2022-yilning dastlabki oylaridan boshlab dunyoning aksariyat mamlakatlarida iqtisodiy tiklanish holatlari kuzatila boshlandi.
Lekin, fevral oyi so‘ngidan Rossiya va Ukraina o‘rtasidagi inqirozli vaziyat hamda energiya bozoridagi tebranishlar, taklif hajmini yuqori talabga moslashishining kechikishi natijasida yuzaga kelgan yuqori inflyatsion bosim va unga javoban pul-kredit siyosatining qat’iylashtirilishi kuzatildi, — deyiladi xabarda.
Bu omillar hisobga olingan holda Xalqaro valyuta jamg‘armasi va Jahon banki tomonidan butun dunyoda, xususan, O‘zbekiston va uning asosiy savdo hamkorlarining iqtisodiy o‘sish sur’atlari qayta ko‘rib chiqildi va 2023-yil uchun o‘sish prognozlari pasaytirildi.
Yangilangan prognozlarga ko‘ra, Xalqaro valyuta jamg‘armasi jahon iqtisodiyotini 2022-yilda 3,2 foizga, 2023-yilda 2,7 foizga, 2024-yilda esa 3,2 foiz atrofida o‘sishini taxmin qilmoqda.
Jahon banki baholashlariga ko‘ra, jahon iqtisodiyoti 2022-yilda 2,9 foizga, 2023—2024-yillarda o‘rtacha 3 foizga o‘sishi kutilmoqda.
Hisobotda ko‘rsatilishicha, O‘zbekistonning asosiy hamkor davlatlarida kelgusi yilda iqtisodiy faollikning 2022-yil darajasidan past bo‘lishi kutilmoqda.
Bunda, Xitoyda 2023-yilda iqtisodiy o‘sish 4,4—4,5 foiz, Qozog‘istonda 3,5—4,4 foiz, Turkiyada 2,7—3 foiz atrofida bo‘lishi prognoz qilinmoqda.
Rossiyada esa, iqtisodiyotning qisqarishi 2023-yilda ham davom etishi, ijobiy o‘sish sur’atlariga 2024-yilda erishilishi kutilmoqda.
Iqtisodiy faollikning nisbatan susayishi va neft narxining joriy darajada saqlanib turishi natijasida asosiy savdo-hamkorlar milliy valyutalarida yuqori tebranuvchanlik kutilmaydi.
Izoh (0)