“Daryo” nashri 21-noyabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiyaning Ukrainaga urush boshidan buyon uchirgan raketalari bugun qanday talafotlarni olib keldi?
270 kundan buyon davom etayotgan keng ko‘lamli urushda Rossiya armiyasi Ukrainaga 4700 dan ortiq raketa uchirdi. Bu haqda 20-noyabr kuni Ukraina prezidenti Vladimir Zelenskiy Frankofoniya xalqaro tashkiloti ishtirokchilariga yo‘llagan videomurojaatida ma’lum qilgan.
“Yuzlab shaharlarimiz shunchaki yoqib yuborildi. Minglab odamlar halok bo‘ldi. Yuz minglab odamlar Rossiyaga majburan deportatsiya qilindi. Millionlab odamlar urushdan qochish uchun Ukrainani tashlab boshqa mamlakatlarga ketdi. Biz bunga chek qo‘yishimiz , Rossiya agressiyasini to‘xtatishimiz kerak”, — dedi Ukraina prezidenti.
Zelenskiy Ukrainaga berilgan oxirgi ommaviy zarbalardan birini eslatib o‘tdi — 15-noyabr kuni mamlakat bo‘ylab yuzga yaqin raketa uchib kelgandi.
Shaharlarimizga, turar joy binolariga qarshi, korxonalarga, elektr stansiyalariga qarshi yuzta turli xildagi raketalar. Raketa hujumi nima ekanini bilasizmi? Bu elektr energiyasidan mahrum qolgan 20 milliondan ortiq odam. Energiya tizimiga yetkazilgan zarar, ularni favqulodda o‘chirish. Energetika sektoriga raketa hujumi tufayli ikkita atom stansiyamizdagi reaktorlar ham yopildi”, — deya ta’kidlagan Zelenskiy.
Rossiya Mudofaa vazirligi 10-oktabrdan buyon Ukrainaning harbiy va energetika obyektlariga muntazam raketa zarbalari berib kelmoqda va buni 8-oktabr kuni Kerch bo‘g‘ozidagi Qrim ko‘prigi portlatilishiga javob deb atamoqda.
Borrel Yevroittifoq va Markaziy Osiyo o‘rtasida Rossiyani aylanib o‘tuvchi transport yo‘laklarini qurishni taklif qildi
Yevroittifoq O‘rta Osiyo bilan hamkorlikni kuchaytirishi kerak, deb hisoblaydi Yevropa diplomatiyasi rahbari Jozep Borrel. Uning fikricha, mintaqaning energetika yetkazmalari, o‘ta muhim xomashyo importi va Rossiyani aylanib o‘tuvchi yangi transport yo‘laklari bo‘yicha salohiyatini amalga oshirish kerak.
“Yevroittifoq sifatida biz bu o‘zgarishlardan foydalanib qolishdan manfaatdormiz. Biz mintaqa bilan aloqalarimizni chuqurlashtirishimiz, uning ulkan salohiyatini ishga tushirishimiz kerak, bular esa energiya manbalari, o‘ta muhim xomashyo yetkazib berish va Rossiyaga bog‘liq bo‘lmagan yangi transport yo‘laklaridan iboratdir”, — deb yozdi Borrel o‘z blogida Markaziy Osiyoga safari yakunlari haqida.
Uning qayd etishicha, gap Transkaspiy yo‘lagi haqida bormoqda, uning Qozog‘istonga tashrifi chog‘ida uni rivojlantirish masalasi muhokama qilingan edi.
Jozep Borrel Markaziy Osiyoga tashrifi mobaynida Yevroittifoq ushbu mintaqa mamlakatlariga investitsiyalar hajmi bo‘yicha yetakchilik qilayotgani, ushbu ko‘rsatkich bo‘yicha Rossiya va Xitoyni ortda qoldirayotganini ma’lum qildi.
Turkiyadagi shaharga Suriyadan raketalar kelib tushdi. Bu "Tirnoq qilich operatsiyasi bilan bog‘liqmi?
Turkiyaning Karkamish shahri(Gaziantep viloyati)ga Suriya shimolidan beshta raketa kelib tushdi, deb xabar bermoqda CNN Turk mintaqa gubernatori Dovut Gulga tayanib.
Gubernatorning aytishicha ikki kishi halok bo‘lgan, olti kishi jarohatlangan. Turkiya ichki ishlar vaziri Sulaymon Soylu uch nafar, jumladan bir bola va bir o‘qituvchi halok bo‘lganini ma’lum qildi.Haberturk ma'lumotlariga ko‘ra, raketalar Turkiyada terrorchi deb tan olingan kurd “Xalq himoyasi otryadlari” va “Kurdiston ishchilar partiyasi” tomonidan uchirilgan.
Turkiya prezidenti Rajab Toyyib Erdo‘g‘on Indoneziyadagi G20 sammitidan qaytgach, Suriya shimoli va Iroqdagi kurd tuzilmalariga qarshi “Tirnoq-qilich” operatsiyasini o‘tkazishga buyruq bergandi.20-noyabr kuni ertalab Anqara Iroq va Suriya shimolidagi kurdlar tomonidan nazorat qilinadigan hududlarga zarba bergani, chunki bu hududlardan “terrorchilar Turkiyaga qarshi hujumlarda baza sifatida foydalangan”i haqida e’lon qildi. Operatsiyaga 50 dan ortiq samolyot va 20 ta dron jalb qilingan.
Turkiya kurdlarni Istanbuldagi teraktni uyushtirganlikda ayblamoqda.
Bola huquqlari bo‘yicha vakil Farg‘onada 15 yoshli bolaning o‘limida ayblanayotgan voyaga yetmaganlar bilan uchrashdi
Bola huquqlari bo‘yicha vakil Aliya Yunusova 18-noyabr kuni Farg‘ona viloyat prokuraturasida 15 yoshli o'smir o‘limida ayblanayotgan va qamoqqa olingan voyaga yetmagan bolalar bilan uchrashdi.
Farg‘ona viloyati Qo‘qon shahridagi Voyaga yetmaganlarga huquqiy yordam ko‘rsatish markazida saqlangan 9-sinf o‘quvchisi vafot etgan. Huquqni muhofaza qiluvchi organlar tomonidan marhumning 17-oktabr kuni markazda vaqtincha saqlanayotgan 6 nafar bolalarga qo‘shilganidan so‘ng, ushbu bolalar yotoqxonasida xonadagi bolalar bilan o‘zaro gap talashib, janjal kelib chiqish oqibatida marhum do‘pposlanib, unga og‘ir tan jarohati yetkazilgani aytilgan.
O‘zaro suhbat davomida qo‘lga olingan bolalar, ularga qo‘yilgan aybni tan olgan va o‘zlariga nisbatan qiynoq, ruhiy va jismoniy bosim qo‘llanilmaganini, advokatlar bilan ta’minlashganini bildirgan.
Bolalar ombudsmani huquqni muhofaza qiluvchi organlar vakillari bilan muloqotda bola huquqlari va manfaatlarini himoya qilish bo‘yicha o‘z tavsiyalarini berib o‘tgan. Hozirda mazkur holat bo‘yicha Farg‘ona viloyat prokuraturasi tomonidan tergov harakatlari olib borilmoqda.
Izoh (0)