«Эрон Қатардаги жаҳон чемпионатига ҳужум қилиши мумкин» — Исроил разведкаси бошлиғи

Исроил ҳарбий разведкаси раҳбари генерал майор Аарон Халива Эрон Қатардаги жаҳон чемпионатига ҳужум уюштиришни режалаштираётгани ҳақида огоҳлантирди. Бу ҳақда The Times of Israel хабар бермоқда.

Тель-Авивда Миллий хавфсизлик тадқиқотлари институтидаги конференцияда чиқиш қилиб, Аарон Халива Эронни қамраб олган норозилик намойишлари «фавқулодда ўзига хос ҳолатлар» эканини ва «фуқаролар исёни»га айланиб кетганини айтди.

«Ҳалок бўлганлар сони, миллий рамзларга ҳужумлар — булар режимни жуда хавотирга соляпти, айниқса, санкциялар халқаро босим ва мураккаб иқтисодий вазиятни ҳам ҳисобга олганда», — деди у.

Халиванинг сўзларига кўра, Эронга босим кучайиб бориши билан, шу жумладан, ички босим, Эроннинг жавоби минтақада ҳам, дунёда ҳам янада тажовузкорроқ бўлиб бормоқда.

«Мен сизга айтай, эронликлар ҳозир жаҳон чемпионатига ҳужум қилиш имкониятини ҳам кўриб чиқмоқда. Уларни ушлаб турган ягона нарса — Қатарнинг бунга жавобан муносабати», — дея огоҳлантирди ҳарбий.

Эрон Ислом инқилоби қўриқчилари корпуси 21 ноябрь куни Ироқ Курдистонидаги «диссидент гуруҳлар» штаб-квартирасини дрон ва ракеталардан ўққа тутган эди. Маълум қилинишича, қисман вайрон бўлган объектларни йўқ қилиш учун Ироқнинг Курд мухториятидаги ҳарбий базалари нишонга олинган. Эрон Ироқда жойлашган курд жангариларини мамлакатда тартибсизликларни қўзғатганликда айблаган. АҚШ Марказий қўмондонлиги Теҳроннинг мазкур ҳужумини қоралаган.

Эронда намойишлар сентябрь ўрталарида, 22 ёшли Маҳса Аминийнинг ўлимидан кейин бошланган. Полиция уни Теҳронда метродан чиқиш чоғида ҳижобни нотўғри ўрагани учун ҳибсга олганди. Мамлакатдаги тартибсизликлар ортидан олти киши ўлимга ҳукм қилинган. Маҳса Аминийни қўллаб-қувватлаш мақсадида Эронда ҳижобларини ечиб ташлаган икки машҳур актриса эса ҳибсга олинган. Теҳрон расмийлари норозилик намойишларини «тартибсизликлар» деб таърифлайди ва мамлакатнинг Ғарб душманларини уларни гижгижлашда айблайди.

Қатар мезбонлигидаги 2022 йилги Жаҳон Чемпионати 20 ноябрь, якшанба куни бошланди. ЖЧ—2022 мусобақаси Қатардаги 8 та стадионда бўлиб ўтмоқда.

Мавзуга доир:

• Эронда намойишлар ортидан олтинчи одам ўлимга ҳукм қилинди
• Эрон Саудия Арабистонини Теҳроннинг «сабрини синамасликка» чақирди
• Эрон ўзининг биринчи гипертовушли баллистик ракетасини ишлаб чиқди