Ijtimoiy tarmoqlarda “Yana MIB xodimi kaltak yedi” sarlavhasi ostida videolavha e’lon qilingandi. Majburiy ijro byurosi “Daryo”ga holat yuzasidan munosabat bildirdi.
Aniqlanishicha, byuroning Yunusobod tumani bo‘limi ish yurituvida fuqarolik qarzdor fuqaro B.R.dan undiruvchi D.M. qizi foydasiga 2 nafar voyaga yetmagan farzandi ta’minoti uchun qarzdorning har oylik ish haqi va boshqa daromadlarining 1/3 qism miqdorida aliment va farzandi uch yoshga to‘lgunga qadar har oyda mehnatga haq to‘lashning eng kam 1/4 baravari miqdorida moddiy ta’minot undirish to‘g‘risidagi ijro hujjati mavjud.
Mazkur aliment undiruvi bilan bog‘liq ijro hujjati yuzasidan 27-fevral kuni qarzdor fuqaro B.R. bo‘lim davlat ijrochisi A.Nosirov tomonidan byuroning Yunusobod tumani bo‘limiga chaqirtirilgan va qarzdor fuqaro davlat ijrochisidan aliment hamda moddiy ta’minot pullarini hisoblab berishni so‘ragan.
Davlat ijrochisi qarzdor B.R.dan aliment hamda moddiy ta’minot pullarini to‘laganini tasdiqlovchi hujjat so‘raganda taqdim qilishdan bo‘yin tovlagan. Shundan so‘ng byuroning Yunusobod tumani bo‘limi binosi tashqarisida fuqaro B.R. davlat ijrochisiga haqoratli so‘zlar ishlatib, qo‘pol muomalada bo‘lgan va boshi bilan uning bosh qismiga zarba bergan. Vaziyatni bartaraf etish maqsadida bo‘lim davlat ijrochisi Sh.Abdukarimov qarzdor B.R va A.N.ni ajratgan.
Holatni o‘rganish davrida fuqaro B.R. davlat ijrochiga nisbatan qo‘pol muomalada bo‘lganini tan olib, undan kechirim so‘ragan, o‘z navbatida, davlat ijrochisi A.Nosirov ham unga nisbatan da’vosi yo‘qligini bildirib, o‘zaro yarashganini bildirgan.
Mavzuga doir:
Izoh (0)