“Bu juda og‘riqli masala”. Davron Fayziyev bolalar futbolidan o‘sib chiqqan iste’dodlar keyinchalik katta sportga yetib borolmayotgani haqida

“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 7-son mavzusi “Mahalla futboli” bo‘lib, dastur mehmoni sifatida sport jurnalisti va sharhlovchi Davron Fayziyev taklif etildi.

Dastur davomida boshlovchi Furqat Mahmudxo‘jayev va mehmon Davron Fayziyev o‘zbek futbolida yetishib chiqayotgan yosh iste’dodlar, ularga yaratilgan sharoitlar, professional sportchi bo‘lishgacha kechadigan sinovlar haqida suhbatlashdi.

— “Mahalliy turnirlardan yorib chiqqan noyob yosh futbolchilar ma’lum paytga kelgandan keyin yo‘q bo‘lib qoladi. Hayot o‘z yoliga soladi, kimdir o‘qishga kiradi, kimdir tirikchilik bilan ovora bo‘ladi. Balki ularning orasida Mirjalol Qosimovlar, Abduraimovlar bor, lekin ular katta futbolga yetib kela olishmayapti. Mahalla futbolini rivojlantirishdan asosiy maqsad ham mana shu brilliantlarni topish”, — deydi Furqat Mahmudxo‘jayev.

— “Keyin yo‘qotib qo‘ymaslik ularni, — qo‘shimcha qildi dastur mehmoni, — Bu juda og‘riqli masala. Chunki bolalar futbolida ancha muvaffaqiyatli o‘ynagan talantlar negadir oxirigacha borib, milliy terma jamoa darajasiga chiqolmay qoladi. Tizimda uzilishlar bo‘lgan, shu uchun hozir qaytadan ishlab chiqilyapti”.

Davron Fayziyevning ta’kidlashicha, futbol faqat maydonda to‘p tepishdan iborat emas. Kun tartibi, vitaminizatsiya, to‘g‘ri ovqatlanishning ham yaxshigina ta’siri bor.

Bu yerda gap futbolchidan ko‘ra, uning ota-onasiga bog‘liq. Bitta futbolchini tarbiyalab, undagi har xil chalg‘ituvchi xayollarni quvish uchun ancha-muncha vaqt, kuch, energiya va hatto mablag‘ni sarflashga to‘g‘ri keladi.

Aytishadi-ku, tanish-bilishchilik deb, to‘g‘ri, qayerdadir bo‘lishi mumkin. Lekin men hech uchratmaganman boyvachcha oiladan futbolchi chiqqanini. Ko‘pincha qiynalgan oilalardan chiqadi, o‘ziga motivatsiya beradi, oilamning yaxshi sharoitda yashashini ta’minlayman deb. Lekin qiyin sharoitda katta bo‘layotgan bolada o‘sha to‘g‘ri ovqatlanish, vitaminlar, vaqtida kerakli mahsulotni yeyish kabi imkoniyatlar bo‘lmasligi mumkin.

Butun protssesni nazorat qilish muhim, — deydi u.