Jizzax viloyati Zarbdor tumanida iste’molga yaroqsiz go‘sht mahsulotlarining sotuvga qo‘yilishi oldi olindi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Bosh prokuratura huzuridagi departamentning Zarbdor tumani bo‘limi tomonidan IIB hamda tuman Veterinariya va chorvachilikni rivojlantirish bo‘limi xodimlari bilan hamkorlikda tezkor tadbir o‘tkazilgan. Unda fuqaro Z.P. fuqaro D.D.ga Jizzax shahri “Toshloq” MFY hududidagi xonadonida iste’molchilar hayoti va sog‘ligi xavfsizligi talablariga javob bermaydigan 201 kg yirik shoxli mol go‘shtini 8,6 mln so‘mga sotishga kelishgani aniqlangan. Shundan 6 mln so‘mni olgan vaqtida ushlanib, uning xonadoni ko‘zdan kechirilganda birlamchi veterinariya hujjatlariga ega bo‘lmagan jami 73 dona qoramol tuyog‘i va 61,3 kg iste’molga yaroqsiz go‘sht mahsulotlari borligi aniqlanib, ashyoviy dalil sifatida olingan.
Mazkur holat yuzasidan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishi qo‘zg‘atilib, tergov harakatlari o‘tkazilmoqda.
Mavzuga doir:
Izoh (0)