“Hozirgi bolalarning ko‘chaga chiqib to‘p tepishga qiziqishi pasaygan. Video-o‘yinlarga e’tibor berishyapti” — Davron Fayziyev

“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 7-son mavzusi “Mahalla futboli” bo‘lib, dastur mehmoni sifatida sport jurnalisti va sharhlovchi Davron Fayziyev taklif etildi.

Suhbat davomida boshlovchi Furqat Mahmudxo‘jayev mehmondan mahallalarda tashkil etilgan kichik hajmli, sun’iy qoplamali futbol maydonlaridan foydalanish sharoitlari, bolalarga maydonchalarda bepul futbol o‘ynash bo‘yicha berilgan imkoniyatlar haqida so‘radi.

Tadbirkor ana shu maydonga pul kiritdimi, u ham moddiy manfaatini o‘ylaydi, sarflagan pulini chiqarib olishi lozim. Shu uchun mahallalardagi katta yoshli insonlar ham pul to‘lab futbol o‘ynayapti va bu foydali — sog‘lom turmush tarzi ta’minlanyapti.

Ammo shuning oqibatida stadionni bolalar uchun bepul qilish holati kamaygan, bu salbiy tomoni, — deydi Davron Fayziyev.

Bolalar oldin ko‘cha changitib, oddiy temirdan darvoza yasab, tuproqda futbol o‘ynardi. Hozir unday emas, stadionlarning bepul vaqtini topish kerak; jamoa bo‘lib borib o‘ynamasa, qimmatroqqa tushadi.

Bolalarning o‘zida ham ko‘chada yurib to‘p o‘ynashga qiziqish pasaygandek. Telefon, video-o‘yinlar, gadjetlar, kompyuterga ko‘proq e’tibor berishyapti. Shunchaki ko‘chaga chiqib, do‘stlar yig‘ilib, to‘pni olib tor ko‘chada bo‘lsa ham o‘ynash holatlari juda kamayib ketgan. Va bu ommaviylikka ham ta’sir qilyapti baribir, — deya qayd etdi mehmon.

— Avval futbol o‘ynaganda yo‘ldan ikkita mashina chiqib qolsa, darrov yo‘l chetiga o‘tib turardik, keyin yana davom ettirilardi. Hozir esa bir daqiqaning o‘zida ikkita avtomobil o‘tib tursa kerak.

— Hozir deyarli to‘xtamaydi ham avtomobillar, oqim katta. Bolalar nafaqat futbol, balki o‘sha oddiy quvlamachoq, berkinmachoq o‘yinlarini ham o‘ynamay qo‘yishgan.