Respublikachilar 218 ta o‘rin bilan AQSH Kongressi Vakillar palatasi ustidan nazoratni qo‘lga kiritdi. Demokratlar 208 o‘ringa egalik qilmoqda. Yana to‘qqizta o‘rin aniqlashtirilmagan.
Nashrning yozishicha, voqealarning bunday natijasi AQSH prezidenti Jo Baydenning ichki kun tartibiga g‘ov bo‘ladi va Oq uyni “qattiq tekshiruvlar”ga duchor qilishi mumkin.
O‘z navbatida, Bayden respublikachilarni g‘alaba bilan tabrikladi va ular bilan hamkorlikka tayyor ekanini aytdi.
“Amerikaliklar bizdan ular uchun harakat qilishimizni kutmoqda. Ular bizdan o‘zlari uchun muhim bo‘lgan masalalarga va hayotini yaxshilashga e’tibor qaratishimizni xohlaydi. Men esa ular uchun natijalarga erishishda men bilan ishlashni istagan har bir kishi bilan hamkorlik qilaman, u xoh respublikachi bo‘lsin, xoh demokrat”, — deyiladi Oq uy bayonotida.
Respublikachilar partiyasining Vakillar palatasidagi g‘alabasi demokrat Nensi Pelosining Vakillar palatasi spikeri sifatidagi ikkinchi muddatini tugatadi. Yangi spiker Respublikachilar palatasi yetakchisi Kevin Makkarti bo‘lishi kutilmoqda.
AQSHda oraliq saylovlar 8-noyabr kuni bo‘lib o‘tdi. Unda Vakillar palatasining butun tarkibini (435 o‘rin) va Senatning uchdan bir qismini (yuzdan 35 o‘rin) qayta saylandi. Bundan tashqari, 36 shtatda yangi gubernatorlar saylangan.
Senat ustidan nazoratni Demokratik partiya o‘rnatdi. Demokratlar 50 o‘rinni qo‘lga kiritdi, respublikachilar esa 49 o‘ringa egalik qilmoqda. Tomonlar teng ovoz olgan taqdirda, demokrat, vitse-prezident Kamala Xarris hal qiluvchi ovozni berish imkoniga ega.
Izoh (0)