Ukraina prezidenti Vladimir Zelenskiy 15-noyabr kuni Polshaga tushgan raketalar Ukrainaga tegishli bo‘lmaganini aytdi. Bu haqda “RBK” xabar berdi.
Prezident jurnalistlar bilan suhbatda raketa Ukrainaniki emasligiga shubhasi yo‘qligini ta’kidladi.
“Bu jiddiy voqea. Bu bizning raketamiz yoki raketa zarbamiz emasligiga shubha qilmayman. Ishonchim komilki, bu bo‘yicha olib borilayotgan tergovda ishtirok etishimiz kerak. Adolatli bo‘lishimizni xohlayman. Agar raketa Ukraina havo mudofaasiga tegishli bo‘lsa, bu dalillarni ko‘rmoqchiman. Avvalambor bizga tergovga qo‘shilishga va sizda bor ma’lumotlar bilan tanishishga ruxsat bering”, — dedi Zelenskiy.
Shuningdek, prezident hodisa yuz bergan kuni tun bo‘yi turli davlat rahbarlari bilan gaplashganini qo‘shimcha qildi.
“Biz sir saqlashga kelishib oldik, lekin shunga qaramay, mening oddiy pozitsiyam bor: Ukraina o‘z o‘rnini egallashiga imkon berish mumkinmi? Bu adolatlimi? Men bunga haqqimiz borligiga ishonaman”, — deydi u.
Zelenskiy Ukrainaga hodisa joyiga kirishga ruxsat berilishi kerakligini qo‘shimcha qildi.
“Yakuniy xulosalar haqida gapira olmaymizmi? Tergov guruhida bo‘lishga haqqimiz bormi? Albatta. Harbiylarning hisobotlariga ishongan holda Polshaga tushgan raketa Rossiyaniki bo‘lganiga ishonaman”, — dedi u.
Bundan tashqari, Ukraina rahbari mamlakat Harbiy havo kuchlarini yopiq eshiklar ortida eshitish adolatli ekanini qayd etdi.
“Ma’lumotni elchixonalar orqali yetkazmasdan, havo kuchlarimiz, qo‘mondonlarimizga quloq tutish kerak. Tafsilotlar, vaqt, o‘qlar, raketalarning raqami haqida bilish zarur. Har bir havo hujumiga qarshi mudofaa raketalarimizdagi raqamlarni bilishni xohlaymiz. Bu raqamlar qayerda ekanligini topmoqchimiz. Agar ular bizning hududimizda bo‘lmasa, men buni ko‘rishni xohlayman”, — deya xulosa qildi Vladimir Zelenskiy.
Eslatib o‘tamiz, 15-noyabr kuni Polshaning Ukraina bilan chegaradosh Prjevodov qishlog‘iga ikkita raketa tushdi, ikki kishi halok bo‘ldi. Voqea sababli Polsha bosh vaziri Mateush Moraveski xavfsizlik va mudofaa bo‘yicha hukumat qo‘mitasining shoshilinch yig‘ilishini o‘tkazdi. Havoga qiruvchi samolyotlar ko‘tarildi. Rossiya Xavfsizlik kengashi raisi o‘rinbosari Dmitriy Medvedev Polshada qulagan raketa bilan bog‘liq voqea G‘arb jahon urushi ehtimolini oshirayotganini isbotlashini aytdi.
O‘z navbatida, Turkiya prezidenti Polshaga tushgan raketalarning Rossiyaga aloqasi yo‘qligini aytdi. NATO bosh kotibi ham raketalarning Ukrainaga tegishli ekani ehtimoli yuqoriligini bildirdi. Ammo bunda Kiyev aybdor emasligi, Rossiya javobgar ekanini aytdi. Polsha prezidenti ham shunday fikrlarni ilgari surdi. Germaniya va Britaniya esa Polshaga raketa tushishiga “Putin urushi” sababchiligini ta’kidladi.
Izoh (0)