Polsha prezidenti Anjey Duda mamlakatga kelib tushgan va ikki kishining o‘limiga sabab bo‘lgan raketa zarbasi Polshani nishonga olmaganini ma’lum qildi. Bu haqda Reuters xabar berdi.
Prezidentning so‘zlariga ko‘ra, Polshaning sharqiga kelib tushgan ikkita raketa Rossiya tomoni uchirilgani haqida hech qanday dalil yo‘q. Raketa Ukraina mudofaa kuchlari tomonidan qo‘llanilgani ehtimoli yuqori”, deydi Duda bosh vazir bilan o‘tkazgan matbuot anjumanida.
Polshaning Ukraina bilan chegaradosh qishlog‘iga 15-noyabr kuni tasodifan ikkita raketa kelib tushdi, Buning oqibatida ikki kishi halok bo‘ldi, havoga qiruvchi samolyotlar ko‘tarildi. Polsha bosh vaziri Mateush Moravetski shoshilinch ravishda Vazirlar Kengashining Milliy xavfsizlik va mudofaa qo‘mitasini chaqirdi. Yig‘ilish o‘tkazish sabablari esa oshkor etilmadi.
Assosiated Press AQSHning uch nafar rasmiysiga tayanib, Polshaga tushgan raketalar Ukraina armiyasining Rossiya hujumini qaytarish uchun otgan raketalari bo‘lishi mumkinligini ma’lum qildi. Pentagon matbuot kotibi Pet Rayder jurnalistlarga raketalarning kimga tegishli ekanini hali tasdiqlay olmasligini aytgan. AQSH prezidenti Jo Bayden ham ularning Rossiyadan uchirilgani hozircha rad etilayotgani haqida gapirdi. Turkiya prezidenti Polshaga tushgan raketalarning Rossiyaga aloqasi yo‘qligini aytdi.
Rossiya Xavfsizlik kengashi raisi o‘rinbosari Dmitriy Medvedev Polshaga raketa otilishi bilan bog‘liq voqea jahon urushi xavfini oshirishini ta’kidladi.
Izoh (0)