Tehrondagi tartibsizliklarda ishtirok etgan 3 eronlik o‘limga hukm qilindi

Eronning Tehron viloyati inqilobiy sudi 16-noyabr, chorshanba kuni tartibsizliklarning uch ishtirokchisiga nisbatan o‘lim hukmini chiqardi, deb xabar beradi Mehr agentligi.

“Tehron inqilobiy sudida tartibsizliklar va xavfsizlikni buzganlar ustidan sud muhokamasi va sudlanuvchilarning advokatlari ishtirokida o‘tkazilgan sud majlisidan so‘ng yana uch nafar tartibsizlikda qatnashgan shaxsga nisbatan hukm o‘qildi”, — deyiladi xabarda.

Agentlikning qayd etishicha, ishtirokchilarning birinchisi mamlakatdagi jamoat tartibini buzish, shuningdek, odamlar va davlat mulkiga zarar yetkazishda ayblanib, jazoga tortilgan.

“Shuningdek, Tehron inqilobiy sudi chiqargan boshqa hujjatga ko‘ra, Pakdashtdagi politsiya postiga o‘t qo‘yib, uning mulkini yo‘q qilganlikda ayblangan ikkinchi mahkum sud tomonidan o‘lim jazosiga hukm qilingan. Uchinchi ayblanuvchi davlat mulkiga zarar yetkazgan va tartibsizliklarda yetakchi rol o‘ynagani sababli o‘limga hukm qilingan”, — deb qo‘shimcha qiladi Mehr.

Avvalroq Eronda 14 ming nafar namoyishchi qatl etilishi mumkinligi haqida xabar berilgan edi.

Erondagi namoyishlarga nima sabab bo‘ldi?

Keyinroq Aminiyning akasi ma’lum qilishicha, politsiyachilar u bilan “qayta tarbiyalash” ishlarini o‘tkazishga va’da bergan. Politsiya uchastkasidan qiz tez yordam mashinasida olib ketilgan. Shifokorlar qizda yurak xuruji va insult yuz berganini bildirgan, u bir necha kundan keyin vafot etgan. Eron politsiyasi baxtsiz hodisa yuz berganini da’vo qilmoqda.

Eron hukumati fikricha, noroziliklar “islom rejimini zaiflashtirish bo‘yicha dushman strategiyasi”ning bir qismidir, mamlakat armiyasi esa namoyishlar fonida “dushmanlarga qarshi kurashish” va xavfsizlikni ta’minlash niyatida.

Eron oliy yetakchisi Ali Xomanaiy namoyishlar “oddiy eronliklar” tomonidan o‘tkazilmayotganini, balki oldindan rejalashtirilganini aytgandi, shuningdek, u AQSH va Isroilni tartibsizliklarni tashkillashtirishda ayblagandi.