Украина президенти Владимир Зеленский 15 ноябрь куни Польшага тушган ракеталар Украинага тегишли бўлмаганини айтди. Бу ҳақда «РБК» хабар берди.
Президент журналистлар билан суҳбатда ракета Украинаники эмаслигига шубҳаси йўқлигини таъкидлади.
«Бу жиддий воқеа. Бу бизнинг ракетамиз ёки ракета зарбамиз эмаслигига шубҳа қилмайман. Ишончим комилки, бу бўйича олиб борилаётган терговда иштирок этишимиз керак. Адолатли бўлишимизни хоҳлайман. Агар ракета Украина ҳаво мудофаасига тегишли бўлса, бу далилларни кўрмоқчиман. Авваламбор бизга терговга қўшилишга ва сизда бор маълумотлар билан танишишга рухсат беринг», — деди Зеленский.
Шунингдек, президент ҳодиса юз берган куни тун бўйи турли давлат раҳбарлари билан гаплашганини қўшимча қилди.
«Биз сир сақлашга келишиб олдик, лекин шунга қарамай, менинг оддий позициям бор: Украина ўз ўрнини эгаллашига имкон бериш мумкинми? Бу адолатлими? Мен бунга ҳаққимиз борлигига ишонаман», — дейди у.
Зеленский Украинага ҳодиса жойига киришга рухсат берилиши кераклигини қўшимча қилди.
«Якуний хулосалар ҳақида гапира олмаймизми? Тергов гуруҳида бўлишга ҳаққимиз борми? Албатта. Ҳарбийларнинг ҳисоботларига ишонган ҳолда Польшага тушган ракета Россияники бўлганига ишонаман», — деди у.
Бундан ташқари, Украина раҳбари мамлакат Ҳарбий ҳаво кучларини ёпиқ эшиклар ортида эшитиш адолатли эканини қайд этди.
«Маълумотни элчихоналар орқали етказмасдан, ҳаво кучларимиз, қўмондонларимизга қулоқ тутиш керак. Тафсилотлар, вақт, ўқлар, ракеталарнинг рақами ҳақида билиш зарур. Ҳар бир ҳаво ҳужумига қарши мудофаа ракеталаримиздаги рақамларни билишни хоҳлаймиз. Бу рақамлар қаерда эканлигини топмоқчимиз. Агар улар бизнинг ҳудудимизда бўлмаса, мен буни кўришни хоҳлайман», — дея хулоса қилди Владимир Зеленский.
Эслатиб ўтамиз, 15 ноябрь куни Польшанинг Украина билан чегарадош Пржеводов қишлоғига иккита ракета тушди, икки киши ҳалок бўлди. Воқеа сабабли Польша бош вазири Матеуш Моравески хавфсизлик ва мудофаа бўйича ҳукумат қўмитасининг шошилинч йиғилишини ўтказди. Ҳавога қирувчи самолётлар кўтарилди. Россия Хавфсизлик кенгаши раиси ўринбосари Дмитрий Медведев Польшада қулаган ракета билан боғлиқ воқеа Ғарб жаҳон уруши эҳтимолини ошираётганини исботлашини айтди.
Ўз навбатида, Туркия президенти Польшага тушган ракеталарнинг Россияга алоқаси йўқлигини айтди. НАТО бош котиби ҳам ракеталарнинг Украинага тегишли экани эҳтимоли юқорилигини билдирди. Аммо бунда Киев айбдор эмаслиги, Россия жавобгар эканини айтди. Польша президенти ҳам шундай фикрларни илгари сурди. Германия ва Британия эса Польшага ракета тушишига «Путин уруши» сабабчилигини таъкидлади.
Изоҳ (0)