NATO bosh kotibi Yens Stoltenberg Polshaga qasddan raketa hujumi uyushtirilgani va Rossiya alyansga hujum qilishni rejalashtirayotgani haqida hech qanday belgi ko‘rmayotganini aytdi. Bu haqda “RIA Novosti” xabar berdi.
Stoltenbergning ma’lum qilishicha, raketa Ukraina tomonidan uchirilgan bo‘lishi mumkin va uning Polshada qulashi tasodif bo‘lgan. Bunda Kiyev aybdor emas. Shu bilan birga, NATO Polshaga uchirilgan raketa uchun pirovardida Rossiya javobgar ekanligini qayd etadi.
“Agar Rossiyaning Ukrainaga qarshi urushi bo‘lmaganida, Polshaga raketa hujumi bo‘lmagan bo‘lardi”, — dedi Stoltenberg.
Shuningdek u Polshadagi voqeadan so‘ng NATOning sharqiy qanotiga qo‘shimcha havo hujumidan mudofaa tizimlari joylashtirilishini ta‘kidladi.
“Alyans davlatlari Polshadagi voqea sababli Shimoliy Atlantika shartnomasining 4-moddasini ko‘rib chiqmoqchi emas”, — deydi NATO bosh kotibi.
15-noyabr kuni Polshaning ZET radiosi Ukraina bilan chegaradosh Prjevodov qishlog‘iga ikkita raketa qulagani, ikki kishi halok bo‘lgani haqida xabar berdi. Voqea munosabati bilan Polsha bosh vaziri Mateush Moravetski xavfsizlik va mudofaa bo‘yicha hukumat qo‘mitasining shoshilinch yig‘ilishini o‘tkazdi. Rossiya Xavfsizlik kengashi raisi o‘rinbosari Dmitriy Medvedev Polshada qulagan raketa bilan bog‘liq voqea G‘arb jahon urushi ehtimolini oshirayotganini isbotlashini aytdi.
Izoh (0)