Xerson viloyatining Rossiya tomonidan bosib olingan qismida Kreml tomonidan tuzilgan viloyat ma’muriyati rahbari o‘rinbosari Yekaterina Gubareva g‘oyib bo‘ldi, deb yozadi Meduza.
Gubarevaning turmush o‘rtog‘i Pavel Gubarevning so‘zlariga ko‘ra, uning rafiqasi 15-noyabr soat 16:30 dan beri aloqaga chiqmagan. Uni oxirgi marta Genicheskda anneksiya qilingan Xerson viloyati hukumat binosi yonida ko‘rishgan (Rossiya tomonidan tuzilgan hokimiyatlar Xersondan qo‘shinlar chekinganidan keyin Genicheskka ko‘chib o‘tgan).
Gubarevning ta’kidlashicha, Rossiya tomonidan tuzilgan ma’muriyat rahbari Vladimir Saldo ham Yekaterina Gubarevaning qayerdaligini bilmaydi.
“TASS”ning xabar berishicha, Yekaterina Gubareva iqtisodiy jinoyat yuzasidan qo‘zg‘atilgan ish bo‘yicha qo‘lga olingan. Rossiya tomonidan Xerson viloyatiga tayinlangan Ichki ishlar vazirligi esa bu ma’lumotni tasdiqlamagan va inkor ham etmagan.
Yekaterina Gubareva 2014-yilda o‘zini o‘zi e’lon qilgan DXRning birinchi tashqi ishlar vaziri bo‘lgan, shundan so‘ng u uzoq vaqt davomida o‘zini o‘zi e’lon qilgan respublika parlamentining deputati sifatida ishlagan. U 2022-yil iyun oyida Xerson viloyatining Rossiya tomonidan tuzilgan ma’muriyati rahbari o‘rinbosari etib tayinlangan.
Izoh (0)