Xitoy Rossiyaning G20 va boshqa xalqaro maydonlardan chetlatilishiga qarshi, dedi Xitoy tashqi ishlar vaziri Van I. Bu haqda vazir Indoneziyaning Bali orolida boshlangan G20 sammiti doirasida Rossiya tashqi ishlar vaziri Sergey Lavrov bilan ikki tomonlama uchrashuvda ma’lum qildi.
“G20 sammitida shaxsan ishtirok etayotganingizdan, sammitda Rossiyaga vakillik qilayotganingizdan juda xursandmiz, bu ulug‘vor missiya. Biz Rossiyaning G20 va boshqa xalqaro platformalar doirasidagi munosib rolini qo‘llab-quvvatlaymiz va Rossiyaning ko‘p tomonli formatlarda qatnashish huquqini tortib olishga hech kim haqli emas, deb hisoblaymiz”, — dedi Van I.
U rossiyalik hamkasbi bilan “o‘zaro manfaatli masalalar, shuningdek, ikki tomonlama munosabatlarda barqarorlikni saqlab qolish uchun zarur hamkorlik” bo‘yicha muhokama o‘tkazmoqchiligini ta’kidladi.
29-oktabr kuni Moskva “don bitimi”dagi ishtirokini to‘xtatganini e’lon qilganidan so‘ng, Ukraina prezidenti Vladimir Zelenskiy Rossiyani G20 dan chiqarib tashlashga chaqirgan edi. “Hozir bizga qat’iy xalqaro javob kerak: BMT darajasida ham, boshqa darajalar, xususan, G20 darajasida ham. G20 da Rossiyaga o‘rin yo‘q”, — degan edi o‘shanda Ukraina prezidenti.
14-noyabr kuni Ukraina Oliy Radasiga G20 davlatlarini Rossiyani tashkilotdan chiqarishga chaqiruvchi murojaat loyihasi kiritildi.
Izoh (0)