Ukraina prezidenti Vladimir Zelenskiy G20 sammitidagi videomurojaatida Rossiya bilan asirlarni “hammaga hamma” formulasi bo‘yicha almashishni taklif qildi, deb yozmoqda “Kommersant”. Shuningdek, u xavfsizlik kafolatlari bo‘yicha kelishuv loyihasi yaratilishini aytdi va Rossiyadan o‘z qo‘shinlarini Ukrainadan olib chiqishni talab qildi.
Zelenskiy sammit ishtirokchilariga qilgan murojaatida Ukrainadagi mojaroni “adolatli ravishda, BMT nizomi va xalqaro huquq asosida” to‘xtatish vaqti kelganini aytdi.
“Iltimos, yetakchilik ko‘rsating va biz birgalikda, albatta, tinchlik formulasini topamiz”, — dedi Ukraina rahbari.
Reuters ta’kidlashicha, Zelenskiy nutqi davomida G20 ni “19 talik guruh” deb atagan va “Rossiyaning a’zoligini tan olishdan bosh tortgan”. Ukrainaning o‘zi G20 ga a’zo emas. Zelenskiy sammitga mezbonlik qilayotgan Indoneziya prezidenti Joko Vidodo tomonidan taklif qilingan.
Ma’lumot uchun Indoneziyaning Bali orolida bugun, 15-noyabr kuni G20 mamlakatlari yetakchilarining sammiti boshlandi. Indoneziya prezidenti Joko Vidodo sammitdagi birinchi nutqida “urushni tugatish”ga chaqirdi.
Izoh (0)