Yer aholisi soni 8 milliarddan oshdi, deb xabar bermoqda BMT matbuot xizmati o‘z hisob-kitoblariga tayanib.
Yer aholisi 1 milliard kishiga ko‘payishi uchun 12 yil kerak bo‘ldi. Insoniyat 8,5 milliard kishilik marradan 2030-yili o‘tishi, 10,4 milliardlik cho‘qqiga esa 2080-yillarda chiqishi prognoz qilinmoqda.
So‘nggi 200 yil ichida odamlar soni sakkiz marta oshgan. Chunonchi, 1900-yillar boshida sayyorada 1,6 milliard odam yashagan bo‘lsa, 2000-yillar boshiga kelib, ularning soni 6 milliardga, 2011-yilda esa 7 milliardga yetgan. Bunday jadal o‘sish tibbiyotning rivojlanishi, sanitariya sohasidagi yutuqlar, ichimlik suvidan foydalanish imkoniyatining kengayishi, keng qamrovli vaksinatsiya bilan izohlanadi.
BMT qayd etishicha, aholi soni doimiy ravishda ortib borayotganiga qaramay, uning o‘sish sur’atlari so‘nggi vaqtlarda sekinlashmoqda. Prognozlarga ko‘ra, 2022-yildan 2050-yilgacha bo‘lgan davrda “tug‘ilish darajasining doimiy ravishda past bo‘lishi va, ba’zi hollarda, emigratsiyaning yuqori darajasi tufayli” 60 dan ortiq mamlakatlar aholisi 1 foizga kamayadi.
Shu bilan birga, tashkilot ma’lumotlariga qaraganda, 2050-yilgacha kutilayotgan aholi soni o‘sishi holatlarining yarmi sakkizta davlatda kuzatiladi, bular — Kongo Demokratik Respublikasi, Misr, Efiopiya, Hindiston, Nigeriya, Pokiston, Filippin va Tanzaniya Birlashgan Respublikasi.
Izoh (0)