Xitoy rahbari Si Szinpin va Fransiya prezidenti Emmanuel Makron Ukrainada o‘t ochishni to‘xtatish va tinchlik muzokaralarini qayta boshlashga chaqirdi. Ular bu haqda Indoneziyaning Bali orolida G20 sammiti boshlanishi oldidan bo‘lib o‘tgan muzokaralar chog‘ida aytdi.
Si Szinpinning so‘zlariga ko‘ra, Xitoyning Ukraina inqirozi bo‘yicha pozitsiyasi aniq va izchil. U o‘t ochishni to‘xtatish, harbiy harakatlarni to‘xtatish va tinchlik muzokaralarini qayta boshlash tarafdori. “Xalqaro hamjamiyat buning uchun sharoit yaratishi kerak, Pekin o‘zining konstruktiv rolini davom ettiradi”, — deb qo‘shimcha qildi Xitoy rahbari.
Makron, o‘z navbatida, Si Szinpindan Rossiya prezidenti Vladimir Putinni Ukraina bo‘yicha muzokaralar stoliga qaytarishni so‘radi, deb yozadi Le Monde.
“Asosiy xalqaro muammolarga bir vaqtda javob berish uchun kuchlarimizni birlashtirish zarur, siz iqlim muammosini tilga oldingiz, shuningdek, Rossiya va Ukraina o‘rtasidagi jangovar harakatlar kabi xalqaro inqirozlarga ham to‘xtalib o‘tish zarur”, — dedi Fransiya rahbari.
Rossiyaning Ukrainadagi bosqini boshlanganidan beri Xitoy neytral pozitsiyani egallab kelmoqda. Mamlakat Ukrainaning hududiy yaxlitligini qo‘llab-quvvatladi, biroq Rossiyaga qarshi sanksiyalar kiritmadi. Sentabr oyida Xitoy tashqi ishlar vaziri tomonlar hech qanday shartlarsiz muzokaralarni davom ettirishi kerakligini aytgan edi. Uning fikricha, ikkala tomon ham mojaroga barham berish shartlarini muhokama qilishi kerak.
Makron, o‘z navbatida, harbiy harakatlar boshlanganidan beri Putinga bir necha bor qo‘ng‘iroq qilib, uni o‘t ochishni to‘xtatishga chaqirdi. AFP Yelisey saroyining yuqori martabali vakiliga tayanib, Fransiya prezidenti G20 dan keyin rossiyalik hamkasbiga qo‘ng‘iroq qilmoqchi ekanini xabar qilgan.
Izoh (0)