Argentina prezidenti Alberto Fernandes Balidagi G20 sammitida o‘zini yomon his qila boshladi. Bu haqda uning matbuot xizmatiga tayanib, “RBK” xabar berdi.
Argentina prezidenti shifokorining bayonotida aytilishicha, Fernandesning qon bosimi tushib, boshi aylana boshlagan. U ko‘rikdan o‘tkazilgan.
Clarin nashrining yozishicha, G20 sammitining birinchi kunida Fernandes o‘rniga Argentinadan tashqi ishlar vaziri Santyago Kafiyero vakillik qiladi.
14-noyabr kuni Associated Press Rossiya tashqi ishlar vaziri Sergey Lavrov G20 sammiti uchun Baliga yetib kelganidan keyin kasalxonaga yotqizilgani haqida xabar berdi. Agentlikning Indoneziya rasmiylari orasidagi manbalariga ko‘ra, rossiyalik diplomat Balida yurak xastaligi bilan bog‘liq muolaja olgan.
O‘z navbatida, Bali gubernatori Reuters agentligiga Lavrovning sog‘-salomat ekani va shifoxonaga tibbiy ko‘rikdan o‘tish uchun qisqa muddatga tashrif buyurganini aytgan.
Rossiya TIV rasmiy vakili Mariya Zaxarova Lavrovning Balidagi kasalxonaga yotqizilgani haqidagi xabarlarni “feyk” deb atadi. Zaxarova Telegram’ga vazirning videosini ham joylashtirdi.
Izoh (0)