Olimlar bundan 30 ming yildan ko‘proq vaqt avval hozirgi Chexiya hududida yashab o‘tgan qizning qiyofasini qayta tiklashga muvaffaq bo‘ldi, deb xabar beradi “Radio Praga”.
Bosh suyak arxeologlar tomonidan 1881-yilda Mladech g‘orlaridan topilgan bo‘lib, ayni paytda Venadagi Tabiiy tarix muzeyida saqlanadi.
Yaqinda esa olimlar ushbu bosh suyagi suratlari orqali qizning tashqi qiyofasini qayta tikladi. Rekonstruksiya Chexiya va Braziliya mutaxassislari tomonidan amalga oshirilgan. Ikkita versiya modellashtirilgan bo‘lib, bittasi oq-qora ko‘rinishda va unda qizning ko‘zlari yumuq. Rangli versiyaga esa sochlar ham qo‘shilgan.
“Kompyuter 2,5 mingtadan ortiq fotosuratlar asosida odam yuzini tasvirlab berdi. Undan avval bosh suyagi suratga tushirildi, yetishmayotgan qismlar to‘ldirildi, bosh suyakka teri qoplanib, sochlar qo‘shildi va portret yaratildi. Bosh suyagining sud-tibbiy rekonstruksiya qilinishi sharofati bilangina, uning erkak kishiga emas, balki ayol kishiga tegishli ekanligi aniqlandi”, — dedi Chexiya G‘arlar ma’muriyati direktori o‘rinbosari Karel Drbal.
Qizning tashqi qiyofasiga kompyuter yordamida ishlov berish uchun mutaxassislarga bir necha oy kerak bo‘ldi. Biroq Karel Drbalning so‘zlariga ko‘ra, bunga materiallarni tayyorlashga bir necha yil ketgan.
Izoh (0)