Toshkent shahrida Markaziy Osiyo ekspertlari alyansi ta’sis etildi. Bu haqda 15-noyabr kuni bo‘lib o‘tgan Markaziy Osiyo ekspertlari forumida aytib o‘tildi, deya xabar bermoqda “Daryo” muxbiri.
Forumda Oliy Majlis Senati raisining birinchi o‘rinbosari Sodiq Safoyevning ta’kidlashicha, mazkur tuzilma siyosatshunoslik yo‘nalishida ilmiy tadqiqotlar o‘tkazadigan mutaxassislarning boshini qovushtirib, mintaqa oldida turgan mushkul savollarga javob topish borasida birinchi qadam hisoblanadi.
Markaziy Osiyo mintaqasida qisqa vaqt ichida fundamental o‘zgarishlar yuz bergani rost. Biz shubhalarni, yashirin va ba’zan oshkora dushmanlikni yo‘qotib, qadriyatlarimizni birlashtirgan holda ekspertlar alyansini yaratish niyatidamiz. Bizning maqsadimiz — mintaqa oldida turgan murakkab muammolarga birgalikda yechim izlashdir, — dedi Senat raisi o‘rinbosari.Tadbirda siyosatshunos Kamoliddin Rabbimovning aytishicha, mintaqa atrofidagi qudratli davlatlarning bosimi ostida Markaziy Osiyo mamlakatlari birlashishga, muammolarga birgalikda yechim topishga mahkum.
Hozir Markaziy Osiyo mintaqasi uchun yangi davr kirib kelmoqda. Ayni damda jahondagi eng yirik urush postsovet hududida (Ukraina va Rossiya o‘rtasida — tahr.) bo'lib o'tmoqda. Avvaliga bu urush ko'pchilikni qo'rqitdi. Ammo hozirga kelib bu voqea Markaziy Osiyo mintaqasining geosiyosiy jihatdan mustaqil bo‘lishida tarixiy bonusga aylanayotganini ko‘rish mumkin, — deya fikrlarini izohladi siyosatshunos.Uning qo‘shimcha qilishicha, mintaqadagi davlatlar hukumatni klanlar va qarindosh urug‘chilik bilan boshqarish tizimidan voz kechishi kerak.
Siyosatshunoslik fanlari doktori Sayfiddin Jo‘rayev esa alyans tashkil etilishining sabablarini izohlab, “bugungi qiyin davrda yetmish marta o‘lchab ham kesish qiyinlik qilayotganini” aytdi.
Mana shu sharoitda masalalarni hal qilishda bilim kerak. Davlatlar chuqur tahlil qilingan qarorlarni qabul qilishi uchun ekspertlar, olimlar turli loyihalarni tayyorlab berishi kerak.Qozog‘iston—Germaniya universiteti professori Rustam Burnashev alyans Markaziy Osiyo davlatlari uchun umumiy, birdek samarali, yakdil g‘oyalarni topishda yordam berishini aytdi.Ushbu ekspertlar jamoasi mustaqil bo‘ladi. Ya’ni, siyosatchi emas, lekin siyosatshunos. Hukumat ichida bevosita qaror qabul qilmaydi, balki qaror qabul qilish uchun mahsulot tayyorlab beradi. Hozirgi paytda ana shunday tahlilchilarni bitta platformaga birlashtirib, ularning kuchlari, intellektual salohiyatidan bir maqsad yo‘lida foydalanish kerak, — dedi olim.
Tojikiston va Qirg‘iziston o‘rtasidagi chegara mojarosini olaylik. Bunda bir jiddiy muammo bor. Ya’ni, ikki mamlakatda bu ziddiyatni turli qarama-qarshi atamalar bilan tasvirlashdi. Biri buni shunchaki chegaraviy nizo desa, boshqasi urush deyapti.Agar biz masalaga ikki qutbdan qarasak, muammoni hech qachon yecholmaymiz. Mana shu forum, bugun rezolyutsiyasi qabul qilinadigan alyans bizga shunday tortishuvli masalalarda murosali yechimga kelishga yordam beradi, — dedi Burnashev.
Forum so‘ngida Markaziy Osiyo ekspertlari alyansi ta’sis etilishi to‘g‘risidagi rezolyutsiya qabul qilindi.
Izoh (0)