Тошкент шаҳрида Марказий Осиё экспертлари альянси таъсис этилди. Бу ҳақда 15 ноябрь куни бўлиб ўтган Марказий Осиё экспертлари форумида айтиб ўтилди, дея хабар бермоқда «Дарё» мухбири.
Форумда Олий Мажлис Сенати раисининг биринчи ўринбосари Содиқ Сафоевнинг таъкидлашича, мазкур тузилма сиёсатшунослик йўналишида илмий тадқиқотлар ўтказадиган мутахассисларнинг бошини қовуштириб, минтақа олдида турган мушкул саволларга жавоб топиш борасида биринчи қадам ҳисобланади.
Марказий Осиё минтақасида қисқа вақт ичида фундаментал ўзгаришлар юз бергани рост. Биз шубҳаларни, яширин ва баъзан ошкора душманликни йўқотиб, қадриятларимизни бирлаштирган ҳолда экспертлар альянсини яратиш ниятидамиз. Бизнинг мақсадимиз — минтақа олдида турган мураккаб муаммоларга биргаликда ечим излашдир, — деди Сенат раиси ўринбосари.Тадбирда сиёсатшунос Камолиддин Раббимовнинг айтишича, минтақа атрофидаги қудратли давлатларнинг босими остида Марказий Осиё мамлакатлари бирлашишга, муаммоларга биргаликда ечим топишга маҳкум.
Ҳозир Марказий Осиё минтақаси учун янги давр кириб келмоқда. Айни дамда жаҳондаги энг йирик уруш постсовет ҳудудида (Украина ва Россия ўртасида — таҳр.) бўлиб ўтмоқда. Аввалига бу уруш кўпчиликни қўрқитди. Аммо ҳозирга келиб бу воқеа Марказий Осиё минтақасининг геосиёсий жиҳатдан мустақил бўлишида тарихий бонусга айланаётганини кўриш мумкин, — дея фикрларини изоҳлади сиёсатшунос.Унинг қўшимча қилишича, минтақадаги давлатлар ҳукуматни кланлар ва қариндош уруғчилик билан бошқариш тизимидан воз кечиши керак.
Сиёсатшунослик фанлари доктори Сайфиддин Жўраев эса альянс ташкил этилишининг сабабларини изоҳлаб, «бугунги қийин даврда етмиш марта ўлчаб ҳам кесиш қийинлик қилаётганини» айтди.
Мана шу шароитда масалаларни ҳал қилишда билим керак. Давлатлар чуқур таҳлил қилинган қарорларни қабул қилиши учун экспертлар, олимлар турли лойиҳаларни тайёрлаб бериши керак.Қозоғистон—Германия университети профессори Рустам Бурнашев альянс Марказий Осиё давлатлари учун умумий, бирдек самарали, якдил ғояларни топишда ёрдам беришини айтди.Ушбу экспертлар жамоаси мустақил бўлади. Яъни, сиёсатчи эмас, лекин сиёсатшунос. Ҳукумат ичида бевосита қарор қабул қилмайди, балки қарор қабул қилиш учун маҳсулот тайёрлаб беради. Ҳозирги пайтда ана шундай таҳлилчиларни битта платформага бирлаштириб, уларнинг кучлари, интеллектуал салоҳиятидан бир мақсад йўлида фойдаланиш керак, — деди олим.
Тожикистон ва Қирғизистон ўртасидаги чегара можаросини олайлик. Бунда бир жиддий муаммо бор. Яъни, икки мамлакатда бу зиддиятни турли қарама-қарши атамалар билан тасвирлашди. Бири буни шунчаки чегаравий низо деса, бошқаси уруш деяпти.Агар биз масалага икки қутбдан қарасак, муаммони ҳеч қачон ечолмаймиз. Мана шу форум, бугун резолюцияси қабул қилинадиган альянс бизга шундай тортишувли масалаларда муросали ечимга келишга ёрдам беради, — деди Бурнашев.
Форум сўнгида Марказий Осиё экспертлари альянси таъсис этилиши тўғрисидаги резолюция қабул қилинди.
Изоҳ (0)