Xorazm viloyati Hazorasp tumani hokimi o‘rinbosari vazifasida ishlagan U.A.ga pora olgani uchun 6 yil ozodlikdan mahrum qilish jazosi tayinlandi. Bu haqda viloyat sudi xabar berdi.
Jinoyat ishlari bo‘yicha Tuproqqal’a tumani sudida 1984-yilda tug‘ilgan, oliy ma’lumotli, 4 nafar farzandning otasi, muqaddam sudlamagan, Hazorasp tumani hokimining sanoatni rivojlantirish, kapital qurilish, kommunikatsiya va kommunal xo‘jalik masalalari bo‘yicha o‘rinbosari lavozimida ishlagan U.A.ga nisbatan jinoyat ishi ko‘rib chiqildi.
Sudda ma’lum bo‘lishicha, ayblanuvchi noqonuniy qurilmalarga qonunda belgilangan tartibda chora ko‘rmaslik, ya’ni buzmaslik evaziga arizachidan jami 12 ming dollarni pora tariqasida berishini talab qilgan va bu pullarni pora tariqasida olgan vaqtida huquqni muhofaza qiluvchi organ xodimlari tomonidan ushlangan.
Sud U.A,ni Jinoyat kodeksining 210-moddasi (pora olish) 2-qismi “b” bandi bilan aybli deb topgan va 2 yil muddatga mansabdorlik va moddiy javobgarlik lavozimlarida ishlash huquqidan mahrum qilib, 6 yil ozodlikdan mahrum qilish jazosini tayinlagan.
Mavzuga doir:
Izoh (0)