Twitter verifikatsiya belgilarini sotishdan voz kechdi. Ularni soxta akkauntlar sotib ola boshladi

Twitter ijtimoiy tarmog‘i Twitter Blue premium-obuna foydalanuvchilarining akkauntlari haqiqiyligini bildiruvchi ko‘k “galochka”larni oyiga sakkiz dollar evaziga sotishdan voz kechdi, deb yozadi Reuters. Bunga Twitter’da soxta hisob yozuvlari soni oshib ketgani sabab bo‘lgan.

Chunonchi, ushbu yangilik joriy qilinganidan keyin, ijtimoiy tarmoqda Ilon Maskning Tesla va SpaceX kompaniyalari, Roblox o‘yin onlayn-platformasi, Nestle oziq-ovqat korporatsiyasi, Lockheed Martin harbiy-sanoat korporatsiyasi va boshqa ko‘plab kompaniyalarning soxta akkauntlari paydo bo‘lgan. Dori ishlab chiqaruvchi Eli Lilly and Company soxta akkauntda e’lon qilingan bepul insulin haqidagi xabar uchun o‘z obunachilaridan uzr so‘rashiga to‘g‘ri kelgan.

Avvalroq ijtimoiy tarmoqqa egalik qiluvchi Ilon Mask: “Iltimos, shuni nazarda tutingki, Twitter yaqin oylarda ko‘p tentakona narsalarni qiladi. Biz ishlaydigan narsani qoldirib, ishlamaydigan narsalarni o‘zgartiramiz”, — deb yozgandi.

Ilon Mask oktabr oxirida Twitter’ni 44 milliard dollarga sotib olish bo‘yicha bitimni yopdi. Yozda u oldi-sotdi bitimidan bosh tortishga uringan edi, biroq sud uni ijtimoiy tarmoqni sotib olishga majbur qildi. Shunday voqealar fonida Maksning boyligi apreldan buyon 70 milliard dollarga pasayib ketdi.

Ijtimoiy tarmoqni sotib olganidan keyin Mask kompaniya xodimlarining yarmini, shu jumladan, bosh direktor Parag Agravalni, moliya direktori Ned Segalni, bosh huquqshunos Vijayu Gaddeni va boshqa bir qator top-menejerlarni ishdan bo‘shatdi.

Bloomberg ma’lumotlariga ko‘ra, Maskning yangi jamoasidagi ikki rahbar xodim — Yoel Rot va Robin Uiler iste’fo bergan. Avvalroq esa Twitter’ning axborot xavfsizligi bo‘limi boshlig‘i Lea Kissner ham ishdan bo‘shab ketgandi.

Ilon Maskning o‘zi esa xodimlariga yuborgan birinchi murojaatida kompaniya bankrot bo‘lishi mumkinligini bildirgan.

Mask verifikatsiya belgisi (ko‘k “galochka”) uchun to‘lov joriy etilishi haqida shu oy boshidayoq e’lon qilgandi. Bu avvalroq uni bepul qo‘lga kiritgan taniqli shaxslar va kompaniyalar profillariga ham tegishli bo‘ladi.