Twitter ижтимоий тармоғи Twitter Blue премиум-обуна фойдаланувчиларининг аккаунтлари ҳақиқийлигини билдирувчи кўк «галочка»ларни ойига саккиз доллар эвазига сотишдан воз кечди, деб ёзади Reuters. Бунга Twitter’да сохта ҳисоб ёзувлари сони ошиб кетгани сабаб бўлган.
Чунончи, ушбу янгилик жорий қилинганидан кейин, ижтимоий тармоқда Илон Маскнинг Tesla ва SpaceX компаниялари, Roblox ўйин онлайн-платформаси, Nestle озиқ-овқат корпорацияси, Lockheed Martin ҳарбий-саноат корпорацияси ва бошқа кўплаб компанияларнинг сохта аккаунтлари пайдо бўлган. Дори ишлаб чиқарувчи Eli Lilly анд Company сохта аккаунтда эълон қилинган бепул инсулин ҳақидаги хабар учун ўз обуначиларидан узр сўрашига тўғри келган.
Аввалроқ ижтимоий тармоққа эгалик қилувчи Илон Маск: «Илтимос, шуни назарда тутингки, Twitter яқин ойларда кўп тентакона нарсаларни қилади. Биз ишлайдиган нарсани қолдириб, ишламайдиган нарсаларни ўзгартирамиз», — деб ёзганди.
Илон Маск октябрь охирида Twitter’ни 44 миллиард долларга сотиб олиш бўйича битимни ёпди. Ёзда у олди-сотди битимидан бош тортишга уринган эди, бироқ суд уни ижтимоий тармоқни сотиб олишга мажбур қилди. Шундай воқеалар фонида Макснинг бойлиги апрелдан буён 70 миллиард долларга пасайиб кетди.
Ижтимоий тармоқни сотиб олганидан кейин Маск компания ходимларининг ярмини, шу жумладан, бош директор Параг Агравални, молия директори Нед Сегални, бош ҳуқуқшунос Вижаю Гаддени ва бошқа бир қатор топ-менежерларни ишдан бўшатди.
Bloomberg маълумотларига кўра, Маскнинг янги жамоасидаги икки раҳбар ходим — Ёэл Рот ва Робин Уилер истеъфо берган. Аввалроқ эса Twitter’нинг ахборот хавфсизлиги бўлими бошлиғи Леа Кисснер ҳам ишдан бўшаб кетганди.
Илон Маскнинг ўзи эса ходимларига юборган биринчи мурожаатида компания банкрот бўлиши мумкинлигини билдирган.
Маск верификация белгиси (кўк «галочка») учун тўлов жорий этилиши ҳақида шу ой бошидаёқ эълон қилганди. Бу аввалроқ уни бепул қўлга киритган таниқли шахслар ва компаниялар профилларига ҳам тегишли бўлади.
Изоҳ (0)