Rossiya qo‘shinlari Xersondan chiqib ketganidan keyin, Genichesk shahri Xerson viloyati bosib olingan qismining ma’muriy poytaxtiga aylanadi. Bu haqda Rossiya tomonidan tayinlangan ma’muriyatda hukumat raisi o‘rinbosarining matbuot kotibi lavozimini egallagan Aleksandr Fomin ma’lum qildi, deb yozadi “RIA Novosti”.
“Bugungi kunda Xerson viloyatining vaqtinchalik ma’muriy poytaxti Genichesk hisoblanadi. Asosiy hukumat organlarining barchasi u yerga joylashtirilgan”, — dedi u.
Avvalroq Kreml Rossiya qo‘shinlarining Xersondan Dneprning chap qirg‘og‘iga olib ketilishi bosib olingan Xerson viloyati statusiga hech qanday ta’sir o‘tkazmasligini ma’lum qilgandi. “Bu Rossiya Federatsiyasi subyekti, bu status qonunan belgilangan va mustahkamlab qo‘yilgan. Bu yerda hech qanday o‘zgarishlar yo‘q va bo‘lishi ham mumkin emas”, — degandi Rossiya prezidenti matbuot kotibi Dmitriy Peskov.
9-noyabr kuni Rossiya mudofaa vaziri Sergey Shoygu Rossiyaning Ukrainaga bosqiniga qo‘mondonlik qiluvchi general Sergey Surovikinning taklifi bilan qo‘shinlarni Xersondan Dneprning chap qirg‘og‘iga olib o‘tishni buyurgandi. Ushbu qarorni shaharni to‘liq ta’minlash imkonsizligi va rossiyalik askarlar hayotini saqlab qolishga intilish bilan izohlashdi.
11-noyabr kuni ertalab Rossiya Mudofaa vazirligi Xersondan chekinish haqida hisobot berdi. Qayd etilishicha, Dneprning chap qirg‘og‘iga jami 30 mingdan ortiq rossiyalik harbiylar hamda besh mingtaga yaqin qurol-yarog‘ va harbiy texnika olib o‘tilgan. Shu kuniyoq shaharga Ukraina harbiylari kirib keldi.
Xerson Ukrainada 24-fevraldan buyon Rossiya armiyasi tomonidan egallab olingan yagona viloyat markazi edi. Genichesk Xersondan taxminan 200 km uzoqlikda, Azov dengizi sohillaridagi Arabatskaya Strelka yaqinida joylashgan.
Izoh (0)