AQSH Ukrainaga jangovar to‘qnashuvlarda qatnashish uchun qurol-yarog‘ yetkazib berishda davom etadi. Bu haqda AQSH prezidentining milliy xavfsizlik bo‘yicha yordamchisi Jeyk Sallivan ma’lum qildi.
“AQSHning pozitsiyasi o‘zgarmaydi, olti oy avval qanday bo‘lsa, shunday bo‘lib qoladi. Biz Ukrainaning janglar maydonidagi pozitsiyasi mustahkamlanishi uchun bor imkoniyatimizni ishga solamiz”, — dedi u.
Prezident yordamchisi qo‘shimcha qilishicha, AQSH ma’muriyati Ukrainadagi nizoni suverenitet va hududiy yaxlitlik tamoyillari asosida tartibga solish mumkin deb hisoblaydi.
Vashington Kiyevga bosim o‘tkazib, unga nima qilish kerakligi haqida buyruq bermaydi, chunki faqat Ukraina tomonigina “muzokaralarni qachon va qanday o‘tkazishni istashi”ni hal qila oladi.
Yanvar oyidan buyon AQSH Ukraina xavfsizlik sohasiga yordam sifatida 19,3 milliard dollar ajratdi, shuning 18,6 milliardi Rossiya qo‘shinlari bu mamlakatga kirganidan keyin berilgan. Vashington tomonidan ko‘mak doirasida Kiyevga, shu jumladan, 4 mingta yuqori aniqlikdagi artilleriya snaryadlari, 8500 dan ortiq Javelin tankka qarshi tizimlari va 38 mingdan ziyod boshqa tankka qarshi tizimlar, 142 ta 155 millimetrli gaubitsalar, 924 mingta 155 millimetrli artilleriya snaryadlari yetkazilgan.
Rossiya Ukraina hukumatiga qurol-yarog‘ yetkazib berilayotganini tanqid qiladi. Kreml Moskva o‘z maqsadlariga erishishini ta’kidlab, bunday xatti-harakatlar nizoni faqat cho‘zishga xizmat qilishini aytmoqda.
Izoh (0)