AQSH prezidenti Jo Bayden COP27 iqlim o‘zgarishi bo‘yicha konferensiyada o‘zidan oldingi prezident Donald Tramp davrida qabul qilingan iqlim bo‘yicha Parij kelishuvidan chiqish qarori uchun uzr so‘radi, deb yozadi “RBK”.
“Parij kelishuvidan chiqqanimiz uchun uzr so‘rayman”, — dedi Bayden konferensiyada.
Qo‘shma Shtatlar prezidenti iqlim inqirozi “inson xavfsizligi va sayyoramiz hayoti” uchun muhim ekanligini ta’kidladi. U delegatlarni AQSH bu masalaga jiddiy yondashayotganiga ishontirdi.
“Yaxshi iqlim siyosati bu — yaxshi iqtisodiy siyosat”, — deb ta’kidladi Amerika prezidenti.
Parij iqlim kelishuvi 2015-yilda 195 davlat tomonidan qabul qilingan. U global isishni cheklashga qaratilgan. Hujjatda nazarda tutilgan chora-tadbirlardan biri uglerod chiqindilarini kamaytirish va texnologik qayta jihozlashdir. Shartnoma ishtirokchilari iqlim muammolarini hal qilish uchun har yili rivojlanayotgan mamlakatlarga 100 milliard dollar ajratishga kelishib olgan.
2017-yilda sobiq prezident Donald Tramp AQSH ushbu kelishuvdan chiqishini e’lon qilgandi. Uning so‘zlariga ko‘ra, hozirgi sharoitda bu mamlakat uchun foydali emas, chunki kelishuvning barcha shartlari bajarilsa, 2025-yilga borib Qo‘shma Shtatlar 2,7 million ish o‘rnini yo‘qotishi mumkin. 2019-yilda Qo‘shma Shtatlar BMTni kelishuvdan chiqqani haqida rasman xabardor qilgan, biroq u bildirishnoma yuborilganidan roppa-rosa bir yil o‘tib kuchga kirishi kerak edi.
2021-yilning 20-yanvarida, inauguratsiyadan bir necha soat o‘tgach, Jo Bayden AQSH prezidenti sifatida Tramp farmonlarini bekor qiluvchi qator hujjatlarni imzoladi. Oradan bir oy o‘tib, fevral oyida Qo‘shma Shtatlar yana Parij kelishuviga qo‘shildi.
Izoh (0)