AQSHning Rossiya bilan munosabatlardagi “yashirin maqsadi” ma’lum bo‘ldi

Ukrainadagi nizo tufayli keskinlik o‘sib borayotganiga qaramay, AQSH prezidenti Jo Bayden ma’muriyati Rossiya bilan yadroviy qurol-yarog‘lar ustidan nazorat bo‘yicha muzokaralarni qayta boshlamoqchi. Bu haqda Foreign Policy jurnali xabar berdi.

Nashrning sobiq va amaldagi amerikalik mansabdorlar orasidagi manbalariga ko‘ra, Moskva va Vashington o‘rtasidagi muzokaralar yaqin kelajakda Qohirada bo‘lib o‘tadi. Bu qurol-yarog‘ ustidan nazorat sohasidagi muloqotni qayta boshlash yo‘lida birinchi qadamga aylanadi.

Strategik hujum qurollarini (SHQ) qisqartirish haqidagi shartnoma bo‘yicha muzokaralarni qayta tiklash 2022-yil yozidan buyon Oq uy va Davlat departamentining yashirin maqsadi bo‘lib kelgan, dedi manbalar. Xususan, ushbu masalada Rossiya tomoni bilan yangi uchrashuv rejasi bir necha oylar davomida ishlab chiqilgan.

AQSH Davlat departamenti vakili Ned Prays 8-noyabr kuni Vashington SHQ-3 shartnomasi doirasida nazoratni qayta tiklash bo‘yicha muzokaralarga tayyorligini bildirgandi. Uning so‘zlariga ko‘ra, tomonlar yaqin kelajakda uchrashuv o‘tkazishga kelishib olgan.

Bloomberg Moskvadagi manbalariga tayanib yozishicha, Shveysariya Rossiyaga qarshi sanksiyalarga qo‘shilgani uchun, uchrashuv Qohirada o‘tkazilishi mumkin.

Avgust boshida Rossiya o‘z obyektlarini SHQ bo‘yicha nazorat faoliyati ostidan vaqtinchalik chiqardi. Rossiya Tashqi ishlar vazirligi qaror “majburan” qabul qilinganini aytib, AQSHni “mavjud voqeliklar”ni hisobga olmagan holda nazorat faoliyatini qayta boshlashga urinishda aybladi.

Rossiya TIV sentabr oxirida AQSH prezidenti Jo Bayden ma’muriyati tomonidan SHQ shartnomasi bo‘yicha muloqotni boshlashga oid “ba’zi signallar”ni sezgan. Kremlda ham iyun oyida SHQ-3 bo‘yicha muzokaralarni qayta boshlashga tayyorlik ma’lum qilingan.

SHQ-3 shartnomasi 2010-yilda Rossiya va AQSH prezidentlari Dmitriy Medvedev va Barak Obama o‘rtasida yana besh yilga cho‘zish imkoniyati bilan o‘n yilga imzolangan edi. 2021-yilda Rossiya prezidenti Vladimir Putin shartnomani 2026-yil 5-fevralgacha uzaytirish haqidagi kelishuvni ratifikatsiya qildi. 2020-yilda tomonlar bu faoliyatni pandemiya tufayli to‘xtatib qo‘ygan.

Shartnomaga ko‘ra, tomonlarning har biri ishlatishga tayyor bo‘lgan ko‘pi bilan 1550 ta yadro zaryadlari, 700 dan ortiq bo‘lmagan qit’alararo ballistik raketalar, suvosti kemalari ballistik raketalari va strategik raketa tashuvchi bombardimonchilar, 800 dan ko‘p bo‘lmagan pusk qurilmalariga ega bo‘lishi mumkin.