Britaniyalik rassom Benksi Kiyev viloyatidagi Borodyanka qishlog‘ida (Kiyevdan 35 km, Buchadan 20 km masofada joylashgan) o‘zining yangi asarini yaratdi. Suratlar uning Instagram’iga joylandi.
Unda vayron bo‘lgan to‘qqiz qavatli turar joy devoriga tushirilgan gimnastikachi qizchaning oq-qora tasvirini ko‘rish mumkin. Bu Benksining Instagram’iga o‘tgan yil dekabridan buyon qo‘yilgan birinchi post bo‘ldi.
Shu yilning martida Rassomning 2005-yilgi urushga qarshi CND Soldiers kartinasi #ABANKSY4UKRAINE auksioni doirasida 81 ming funt sterlingga sotilgandi. Unda yadroviy qurolsizlanish bo‘yicha kampaniya ramzini chizayotgan ikki askar tasvirlangan. Olingan pullarni Kiyevdagi “Oxmatdet” bolalar kasalxonasiga yordam berish uchun yo‘naltirish rejalashtirilgan edi.
Borodyanka va Buchani Rossiya harbiylari maxsus operatsiya boshlanganidan keyin tezda bosib olgan edi. Moskva va Kiyev Istanbuldagi muzokaralar chog‘ida Rossiya tomonidan “Kiyev va Chernigov yo‘nalishlarida harbiy faollik”ning kamaytirilishi haqida kelishib olganidan keyin, 30-mart kuni Rossiya armiyasi bu aholi punktlarini tark etgan.
1-aprel kuni Bucha ma’muriyati vakillari shahar ko‘chalarida odamlar jasadlari yotgani haqida xabar berdi. Ikki kundan keyin OAVlar, shuningdek, Ukraina hukumati Buchadan olingan kadrlarni e’lon qildi, ularda jasadlarni ko‘rish mumkin. Reuters ular tinch aholiga tegishli murdalar ekanini ma’lum qildi.
Rossiya Mudofaa vazirligi bunga javoban Rossiya harbiylari Buchada tinch fuqarolarning o‘ldirilishiga aloqador emasligini, e’lon qilingan xabarlar esa provokatsiya ekanini ma’lum qildi. “Birorta ham tinch fuqaro jabr ko‘rmagan”, — deyishdi idorada.
Mavzuga doir:
- Benksining shreder yordamida maydalangan surati yana sotuvga qo‘yiladi. Uning narxi 4 barobarga oshgan
- Benksi anonim qolishni istagani sabab so‘nggi 10 oyda oltita kartinasining mualliflik huquqidan ayrildi
- Benksining superqahramon-hamshira haqidagi surati auksionda qariyb 17 mln funtga sotildi. Bu rassom ishlari orasidagi eng qimmat asar
Izoh (0)