Jahon sog‘liqni saqlash tashkiloti (JSST) rahbari Tedros Adxanom Gebreyesus fevraldan buyon COVID-19 bilan kasallanish oqibatida o‘lim holatlari soni 90 foizga pasayganini ijobiy siljish deb atadi. Bu haqda “Interfaks” xabar bermoqda.
JSST rahbari qayd etishicha, o‘tgan bir hafta davomida 9,4 ming kishi koronavirus tufayli vafot etgan. Fevral oyida esa bir haftalik o‘lim ko‘rsatkichi 75 ming atrofida bo‘lardi.
“Biz uzoq yo‘lni bosib o‘tdik, va bu haqiqatan ham optimizm uchun sabab bo‘la oladi. Ammo biz hukumatlar, jamiyatlar va barcha odamlarni hushyor bo‘lishga chaqiramiz”, — dedi u.
Gebreyesus virusning yangi variantlari haligacha paydo bo‘lib turgani sababli, ogoh bo‘lishga chaqirdi.
COVID-19 pandemiyasi boshidan buyon, JSST ma’lumotlariga ko‘ra, butun dunyo bo‘ylab 629 million kishi kasallangan va 6,5 million odam virus oqibatida vafot etgan.
Izoh (0)