“Rossiya armiyasida real muammolar bor”. Jo Bayden Rossiyaning Xersondan chekinishi haqida

AQSH prezidenti Jo Baydenning ta’kidlashicha, Rossiya qo‘mondonligining Xersondan qo‘shinlarni olib chiqish haqidagi qarori kutilgan edi, ammo bu AQSHdagi Kongress saylovlari yakunlangan paytga to‘g‘ri kelgani qiziq bo‘ldi. Bu haqda Bayden Oq uyda bo‘lib o‘tgan brifingda gapirdi.

“Avvalo, bizga allaqachon ma’lum bo‘lgan ushbu qarorni qabul qilish uchun ular AQSH saylovlarini oxirigacha kutgani men uchun qiziq bo‘ldi. Bu esa ularda, ya’ni Rossiya armiyasida real muammolar borligini ko‘rsatadi”, — dedi Bayden.

AQSH prezidentining so‘zlariga ko‘ra, rus qo‘shinlarining Xersondan olib chiqilishi “hammaga qish mavsumida o‘z pozitsiyalarini qayta ko‘rib chiqish uchun vaqt beradi”.

“Ukraina Rossiya bilan murosaga tayyor-tayyor emasligi haqida qaror qabul qiladimi yoki yo‘q, buni hali ko‘rish kerak”, — dedi Bayden.

Jurnalistlardan biri Baydendan “Ukraina tomonining murosasi deganda, hududiy yon berish nazarda tutilyaptimi” deb so‘radi. AQSH prezidenti esa bu Kiyevga bog‘liq, deya javob qaytardi: “Ukrainasiz Ukraina bo‘yicha hech narsa nazarda tutilmaydi”.

Menimcha, hozir masala Rossiya qo‘shinlari El-Fallujadan (Bayden dastlab Xersonni Iroqdagi shahar nomi bilan adashtirib yubordi — “Daryo” izohi) chekinyaptimi yoki yo‘qligi. Men Xersonni, Xerson shahrini nazarda tutyapman. Ular daryoning sharqiy tomoniga qaytmoqda. Va endi nima bo‘ladi: har ikki tomon ham jarohatlarni davolab, qishda nima qilishni, murosaga kelish-kelmaslikni hal qiladi, — dedi Bayden.

Meduza manbalariga ko‘ra, Kreml Xersonning qaytarib berilishini “harbiy zarurat” va “muzokaralarga taklif” deb bilmoqda. Manbalarga ko‘ra, Rossiya hukumati armiyaning 2023-yilda yangi to‘laqonli hujumga tayyorgarlik ko‘rishi uchun o‘t ochishni vaqtinchalik to‘xtatmoqchi. Avvalroq Ukraina rasmiylari Rossiya prezidenti Vladimir Putin muzokaralarga tayyor emasligini aytgandi.