Ukrainadagi urushda 100 mingdan ortiq rossiyalik harbiy halok bo‘ldi yoki yaralandi, deya ma’lum qildi AQSH Shtab boshliqlari birlashgan qo‘mitasi rahbari general Mark Milli.
“Ukraina tomoni ham xuddi shunday yo‘qotishlarga uchragan bo‘lishi mumkin”, — dedi Milli Nyu-York Iqtisodiy klubida. Uning aytishicha, urush boshlanganidan beri 40 mingga yaqin ukrainalik tinch aholi halok bo‘lgan, yana 15—30 million ukrainalik qochqinga aylangan.
General, shuningdek, Rossiyaning Ukrainaga bostirib kirishini “katta strategik xato” deb atadi va buning uchun mamlakat “ko‘p yillar” tovon to‘lashini aytdi.
Milli o‘z taxminlarida nimaga asoslangani va ma’lumotlarni qayerdan olgani haqida batafsil gapirmadi. Reuters agentligining qayd etishicha, generalning hisob-kitoblarini mustaqil tasdiqlash imkonsiz.
Urush boshlanganidan beri Rossiya Mudofaa vazirligi Ukrainadagi yo‘qotishlari haqida bor-yo‘g‘i uch marta — oxirgi safar 21-sentabr, Rossiyada safarbarlik boshlangan kuni e’lon qilgan edi. O‘shanda mudofaa vaziri Sergey Shoygu jangovar harakatlar paytida 5937 nafar rossiyalik askar halok bo‘lganini aytdi.
Ukraina Qurolli kuchlari Bosh shtabi esa 9-noyabr holatiga ko‘ra, Rossiya tomonining yo‘qotishlari deyarli 78 ming kishiga yetganini da’vo qilmoqda.
Oktabr oyi o‘rtalarida “Vajniy istoriy”ning Rossiya maxsus xizmatlaridagi manbalari Rossiya armiyasining Ukrainadagi yo‘qotishlari 90 mingdan ortgani haqida xabar bergan.
Izoh (0)