AQSH Davlat departamenti Litvaga HIMARS yoppasiga o‘t ochuvchi reaktiv tizimlari va ular uchun zarur jihozlarni sotishga ruxsat berdi. Vilnyus sakkizta HIMARS tizimi va ularga o‘q-dori so‘ragan. Kelishuv qiymati 495 million dollarga baholanmoqda.
“Bu kelishuv NATO ittifoqchisining mudofaa qobiliyatini mustahkamlashga yordam berishi bilan AQSH tashqi siyosati va milliy xavfsizlik maqsadlariga mos keladi”, — AQSH Mudofaa vazirligining xavfsizlik bo‘yicha hamkorlik agentligi bayonotida. Pentagonning fikricha, HIMARS’ning Litvaga sotilishi mintaqadagi asosiy harbiy muvozanatni o‘zgartirmaydi.
AQSH ma’muriyati o‘z qarori haqida Kongressni xabardor qilgan. U 30 kun ichida bitimni ko‘rib chiqadi.
Rossiyaning Ukrainada harbiy amaliyoti boshlanganidan keyin NATO sharqiy chegaralarda o‘z ishtirokini kuchaytirmoqda. Yozda Shimoliy Atlantika alyansi Sharqiy Yevropadagi tezkor harakat kuchlari sonini 40 mingdan 300 ming nafargacha oshirishga qaror qildi.
Iyun oyidan beri AQSH Ukrainaga HIMARS qurilmalarini yetkazib bermoqda. Ukraina Qurolli kuchlari ushbu reaktiv tizim Rossiya harbiy obektlariga, jumladan, havo hujumidan mudofaa tizimlari va o‘q-dorilar omborlariga o‘nlab zarbalar yo‘llash imkonini beruvchi qimmatli vositaga aylanganini ta’kidlamoqda. Rossiya Qurolli kuchlari Ukrainadagi bir nechta HIMARS qurilmasini yo‘q qilishga muvaffaq bo‘lganini ma’lum qilgan, ammo buni na Ukraina, na Amerika tomoni tasdiqladi.
Izoh (0)