Amerikalik aktyor va kinorejissor Shon Penn Rossiya “maxsus operatsiyasi” boshlanganidan buyon Ukrainaga uchinchi marta tashrif buyurdi, u Kiyevda Ukraina prezidenti Vladimir Zelenskiy bilan uchrashuv o‘tkazdi. Bu haqda Zelenskiy o‘z Telegram-kanalida ma’lum qildi.
“Bu safar uchrashuvimiz o‘ziga xos bo‘ldi. Shon mamlakatimizning g‘alabasiga ishonch ramzi sifatida o‘zining ‘Oskar’ haykalchasini olib keldi. U jangovar harakatlar tugaguniga qadar Ukrainada qoladi”, — deb yozdi Zelenskiy.
Shuningdek, u aktyorga III darajali “Xizmatlari uchun” ordenini topshirdi. Shon Penn va Ukrainani qo‘llab-quvvatlaydigan boshqa amerikaliklarni taqdirlash haqida Zelenskiy avgust oxirida farmon chiqargandi. Bundan tashqari, prezident va aktyor “Jasorat xiyoboni”da bo‘ldi, u yerda Shon Penning ismi tushirilgan tablichka bor.
Birinchi marta aktyor Ukrainaga maxsus operatsiya boshlangan kuni — 24-fevralda kelgandi. So‘ng Penn mamlakatga bir oydan keyin qaytib keldi, u Lvovga tashrif buyurib, gumanitar yordam va qochqinlarni qo‘llab-quvvatlashni muhokama qildi.
Sentabr oyida Rossiya Tashqi ishlar vazirligi Penning mamlakatga kirishini taqiqlab qo‘ydi.
Aktyor ikki marta “Oskar” mukofotiga sazovor bo‘lgan: 2009-yilda “Xarvi Milk” filmidagi roli uchun eng yaxshi erkak aktyor sifatida mukofot olgan bo‘lsa, 2004-yilda xuddi shu yo‘nalishda “Sirli daryo” kartinasidagi roli uchun “Oskar”ga loyiq deb topilgan. Bundan tashqari, Penn Amerika kinoakademiyasi mukofoti uchun yana uch marta nomzod qilib ko‘rsatilgan.
Izoh (0)