Ukraina prezidenti Vladimir Zelenskiyning Rossiya bilan muzokaralar uchun shartlari haqidagi bayonoti AQSHning “yengilgina turtkisi” bilan bog‘liq bo‘lgan, deb yozadi Politico o‘z manbalariga tayanib.
Shu bilan birga, amerikalik amaldorlar ukrainalik hamkasblari bilan suhbatlarda Ukrainaning o‘z pozitsiyasini o‘zgartirishini bevosita talab qilmagan, biroq ular Kiyev jangovar harakatlarni tinch yo‘l bilan va oqilona tugatishga tayyorligini namoyish etishi kerakligini ta’kidlagan.
“Bu ular hoziroq muzokaralarni boshlashi kerak degani emas. Biz hatto, Rossiyaning harakatlaridan kelib chiqib, hozir ayni mavridi emas, degan fikrdamiz”, — dedi AQSH prezidenti ma’muriyatining yuqori mansabli xodimi.
Gap Zelenskiy 8-noyabr kuni e’lon qilgan bayonot haqida bormoqda. U Rossiya bilan muloqot boshlash uchun Ukrainaning shartlarini ma’lum qilgandi. Ular esa Rossiyaga qo‘shib olingan hududlar qaytarilgan holda Ukraina hududiy yaxlitligining qayta tiklanishi, BMTga hurmat, barcha zararlarning qoplanishi, har bitta harbiy jinoyatchining jazolanishi va bu boshqa hech qachon takrorlanmasligining kafolatlanishidan iborat edi.
Avvalroq AQSH va NATO hukumati Ukraina armiyasi Rossiya qo‘shinlari tomonidan egallangan Xersonni ozod etganidan keyin Rossiya bilan muzokaralarni boshlashi mumkin, degan fikrda ekanligi, AQSH bunday xabarni Yevroittifoqqa uzatgani va endi bu fikrni Ukraina hukumatiga uqtirayotgani xabar berilgandi.
Noyabr boshrog‘ida Amerikaning The Washington Post gazetasi AQSH prezidenti ma’muriyati Ukraina hukumatiga murojaat qilib, Ukrainani qo‘llab-quvvatlayotgan mamlakatlar aholisini xavotirga solmaslik uchun Kiyev Moskva bilan muzokaralarga tayyorligini ommaga namoyish qilishni so‘ragani haqida xabar bergandi.
Ukraina Rossiya bilan muzokaralardan rasman voz kechgandi
30-sentabr kuni Kremlda Donetsk va Lugansk xalq respublikalari hamda Ukrainaning Xerson va Zaporojye viloyatlari bosib olingan qismlarining “Rossiya tarkibiga kirishi” haqida shartnomalar imzolandi. O‘sha kuniyoq Ukraina hukumati NATOga qo‘shilish uchun ariza berdi. Zelenskiy o‘shanda Rossiya bilan muloqotga tayyorligini aytgan, lekin “boshqa prezident bilan” degan edi.4-oktabr kuni esa Ukraina rasman Putin bilan har qanday muzokaralardan bosh tortdi.
Izoh (0)