Ilon Maskning boyligi, u aprel oyida Twitter ijtimoiy tarmog‘ini sotib olishi haqida e’lon qilganidan buyon, 70 milliard dollarga kamaydi, deb yozadi Reuters.
Forbes’ning real vaqt davomida yangilanib turiladigan milliarderlar reytingiga ko‘ra, 8-noyabr kuni Maskning boyligi 200 milliard dollarlik marradan pastga tushgan.
Bu uning elektromobillar ishlab chiqaruvchi Tesla kompaniyasi aksiyalari kursi pasaygani bilan bog‘lanmoqda. Mask endi Twitter’ni rivojlantirishga ko‘proq e’tibor bera boshlaganidan xavotirga tushgan investorlar Tesla aksiyalarini sotib yubormoqda. Natijada Tesla o‘z bozor qiymatining qariyb yarmini yo‘qotdi, u ayni paytda 622 milliard dollarni tashkil etmoqda.
Shunga qaramay, Ilon Mask hamon dunyodagi eng badavlat odam bo‘lib qolmoqda — u o‘zidan keyingi pog‘onada turgan LVMH kompaniyasi egasi Bernar Arnoni salkam 40 milliard dollarga ortda qoldirmoqda.
Mask Twitter’ni sotib olish bo‘yicha bitimni 27-oktabr kuni yopgandi, kompaniya uchun esa 44 milliard dollar to‘lagandi.
Izoh (0)