Америкалик актёр ва кинорежиссёр Шон Пенн Россия «махсус операцияси» бошланганидан буён Украинага учинчи марта ташриф буюрди, у Киевда Украина президенти Владимир Зеленский билан учрашув ўтказди. Бу ҳақда Зеленский ўз Telegram-каналида маълум қилди.
«Бу сафар учрашувимиз ўзига хос бўлди. Шон мамлакатимизнинг ғалабасига ишонч рамзи сифатида ўзининг ‘Оскар’ ҳайкалчасини олиб келди. У жанговар ҳаракатлар тугагунига қадар Украинада қолади», — деб ёзди Зеленский.
Шунингдек, у актёрга III даражали «Хизматлари учун» орденини топширди. Шон Пенн ва Украинани қўллаб-қувватлайдиган бошқа америкаликларни тақдирлаш ҳақида Зеленский август охирида фармон чиқарганди. Бундан ташқари, президент ва актёр «Жасорат хиёбони»да бўлди, у ерда Шон Пеннинг исми туширилган табличка бор.
Биринчи марта актёр Украинага махсус операция бошланган куни — 24 февралда келганди. Сўнг Пенн мамлакатга бир ойдан кейин қайтиб келди, у Львовга ташриф буюриб, гуманитар ёрдам ва қочқинларни қўллаб-қувватлашни муҳокама қилди.
Сентябрь ойида Россия Ташқи ишлар вазирлиги Пеннинг мамлакатга киришини тақиқлаб қўйди.
Актёр икки марта «Оскар» мукофотига сазовор бўлган: 2009 йилда «Харви Милк» фильмидаги роли учун энг яхши эркак актёр сифатида мукофот олган бўлса, 2004 йилда худди шу йўналишда «Сирли дарё» картинасидаги роли учун «Оскар»га лойиқ деб топилган. Бундан ташқари, Пенн Америка киноакадемияси мукофоти учун яна уч марта номзод қилиб кўрсатилган.
Изоҳ (0)